მეუფე ნიკოლოზი: ისრების გადატანა ჟურნალისტებზე არასწორია, ეს არ იყო საპატრიარქოს პოზიცია
გამოქვეყნდა:
ახალქალაქის, კუმურდოსა და კარის მიტროპოლიტი ნიკოლოზი ამტკიცებს, რომ ცხრამუხის დედათა მონასტერში მონაზონზე განხორციელებულ თავდასხმასთან დაკავშირებით, საპატრიარქოს პრესსამსახურის ხელმძღვანელის დეკანოზ ანდრია ჯაღმაიძის განცხადება, საპატრიარქოს ოფიციალური პოზიცია არ იყო.
მეუფე ნიკოლოზის თქმით, ანდრია ჯაღმაიძემ სოციალურ ქსელში თავისი პოზიცია გამოხატა.
"შეიძლება მან გადაამლაშა და ისრების გადმოტანა ჟურნალისტებზე, რომ თქვენი ბრალია ყველაფერი, ნამდვილად არასწორია. მე ვერ გეტყვით, ეს მისი პირადი ინიციატივაა, მან თავის პოსტზე დადო ეს თუ ეს იყო საპატრიარქოს განცხადება, მგონი, ეს არ იყო საპატრიარქოს განცხადება. ანდრია ჯაღმაიძეს, რაც ადრე წარმოუდგენელი იყო, ახლა შეუძლია, თავის თავს მისცეს უფლება, რომ თავისი აზრი გამოთქვას. ყოველთვის, ნებისმიერი სასულიერო პირის განცხადება, როგორც ეკლესიის პოზიცია ისე აღიქმებოდა, ახლა შეიცვალა ვითარება. მე ვფიქრობ, რომ მაგის განზოგადება მაინც არ არის სწორი და არ შეიძლება ითქვას, რომ ეს საპატრიარქოს პოზიციაა", - თქვა მეუფე ნიკოლოზმა.
ცნობისთვის, დეკანოზმა ანდრია ჯაღმაიძემ ცხრამუხის დედათა მონასტერში მომხდარი ძალადობა მედიასა და კრიტიკოსებს დაუკავშირა და თქვა: "ანტიეკლესიური კამპანია მასმედიის ზოგიერთი საშუალების მხრიდან, მოსახლეობის ნაწილზე მძიმე გავლენას ახდენს". "მთავარი არხი" ჯაღმაიძეს დამატებითი განმარტებებისთვის დაუკავშირდა, თუმცა მან სატელეფონო ზარებს არ უპასუხა.
ჯაღმაიძის მსგავსი შინაარსის განცხადება გააკეთა დღეს სურამისა და ხაშურის ეპისკოპოსმა სვიმონმა.
მონაზონზე თავდასხმა 25 ნოემბერს მოხდა. პოლიციამ მომხდარზე 2 პირი - 27 და 39 წლის კაცები დააკავა, გამოძიება მათ ჯგუფურ ყაჩაღობასა და გაუპატიურებას ედავება.
ამავე თემაზე:
- ომბუდსმენი: მონასტერში მომხდარი დანაშაულის მიზეზების გადაბრალება მედიასაშუალებებისთვის უკიდურესად საშიში და არასწორია
- იქნებ იმის ბრალია, რომ მედიამ კი არა, საპატრიარქომ ეკლესია აქცია ძალადობის მთავარ მქადაგებელ, ‘გამპრავებელად’ ? | "გირჩი - მეტი თავისუფლება"
- ანტიეკლესიური კამპანია მასმედიის ზოგიერთი საშუალების მხრიდან, მოსახლეობის ნაწილზე მძიმე გავლენას ახდენს - ჯაღმაიძე მონასტერში ძალადობაზე
