აქონდროპლაზიის სინდრომის მქონე ბავშვების დედები კანცელარიასთან 24-საათიან პროტესტს წყვეტენ

აქონდროპლაზიის დიაგნოზის მქონე ბავშვების მშობლებმა მთავრობის კანცელარიასთან 24-საათიან პროტესტი შეწყვიტეს. აღნიშნული გადაწყვეტილება მათ ჯანდაცვის სამინისტროში  შეხვედრის შემდეგ მიიღეს. 

მათივე თქმით, დღეს მიიღეს დაპირება, რომ როგორც კი ყველაფერი იქნება მზად პრეპარატ "ვოსორიტიდის" შემოსატანად, ფინანსთა სამინისტრო შესაბამის თანხებს გამოყოფს.

"დაწვრილებით მოვისმინეთ, პროტოკოლზე მომუშავე ექიმების თითოეული კომენტარი, სადაც ერთხელ და სამუდამოდ დავრწმუნდით, რომ პროტოკოლი მაისის ბოლოს იქნება დასრულებული. ასევე მოვისმინეთ ფინანსთა სამინისტროს წარმომადგენლის განცხადება და მან განაცხადა, რომ ფინანსთა სამინისტრო მზად არის, როდესაც ჯანდაცვის სამინისტრო გადაწყვეტს წამლის შესყიდვას საქართველოში, ის დაუყოვნებლივ გამოყოფს თანხებს. ჩვენ მშობლებმა გადავწყვიტეთ, რომ წინ უფრო მეტი გვაქვს სამუშაო და გვჭირდება მშვიდი გონება, ვჭირდებით პირველ რიგში ჩვენს ოჯახებს, ვწყვეტთ 24-საათიან აქციას კანცელარიასთან", -  ამბობს ქეთი ბეგიაშვილი

ცნობისთვის, დღეს ჯანდაცვის სამინისტროში იშვიათი დაავადებების საკითხზე მომუშავე საკოორდინაციო საბჭოს მორიგი სხდომა გაიმართა. უწყების ცნობით ექსპერტების ჯგუფი მზად არიან, ბავშვების საუკეთესო ინტერესებიდან გამომდინარე, დაჩქარებულ ვადებში, უზრუნველყოს აქონდროპლაზიის მართვისთვის აუცილებელი პროტოკოლისა და გაიდლაინის შექმნა.