ჩუტყვავილათი გარდაცვლილი ბავშვის მშობლებმა მკურნალობაზე უარი განაცხადეს და კლინიკა თვითნებურად დატოვეს - პედიატრი

სამედიცინო და ფარმაცევტული საქმიანობის რეგულირების სააგენტომ გორში, სავარაუდოდ, ჩუტყვავილას გართულების შედეგად გარდაცვლილი 4 წლის ბავშვის საქმის შესწავლა დაიწყო. პარალელურად, საკითხთან დაკავშირებით ცოტა ხნის წინ, განცხადება გაკეთდა სამედიცინო ქსელ გორმედის ბაზაზე არსებულ კლინიკა "იავნანაშიც". 

პედიატრიული განყოფილების ხელმძღვანელი ამბობს, რომ პაციენტი კლინიკაში 17 მაისს,  ღამით შეიყვანეს. პედიატრის თქმით, შეთავაზებული იყო მკურნალობის სქემა, საჭირო იყო მისი სტაციონარში მოთავსება, რაზეც მშობლებმა განაცხადეს უარი და თვითნებურად დატოვეს კლინიკა.  

"პაციენტი, 4 წლის კლინიკაში შემოყვანილ იქნა 17 მაისს, ღამის სამ საათსა და 50 წუთზე. მორიგე ექიმის მიერ, ვერიფიცირებულ იქნა ჩუტყვავილას დიაგნოზი, პაციენტზე შეთავაზებული იყო მკურნალობის გამოკვლევის სქემა და ამისთვის საჭირო იყო მისი მოთავსება სტაციონარში, რაზეც პაციენტის მშობლებმა განაცხადეს უარი და თვითნებურად დატოვეს კლინიკა" ამბობს ლია ლაზარაძე, "იავნანას" პედიატრიული სამსახურის ხელმძღვანელი.

მისივე თქმით, კლინიკას ამის დამადასტურებელი დოკუმენტაცია აქვს და ოქმის შედგენაც შეუძლია.

დაღუპული ბავშვის ოჯახი კი ამბობს, რომ დედაქალაქში მცირეწლოვნის გადაყვანის გადაწყვეტილება მას შემდეგ მიიღეს, რაც ადგილობრივმა ექიმებმა გულგრილობა გამოიჩინეს და სამედიცინო დახმარების გაწევა გააჭიანურეს. 

ბავშვი ციციშვილის კლინიკაში მიყვანამდე დაიღუპა. იქამდე კი 4 წლის თომას სახლში, ოჯახის ექიმის რეკომენდაციის საფუძველზე მკურნალობდნენ. საკითხს სწავლობს გორის საზოგადოებრივი ჯანდაცვის ცენტრიც. სიკვდილის გამომწვევ ზუსტ მიზეზს ექსპერტიზა ადგენს.