2023 წლის პირველ კვარტალში საქართველოს მთლიანი საგარეო ვალი $333,4 მილიონით გაიზარდა - სებ

ეროვნული ბანკის ინფორმაციით, 2023 წლის პირველ კვარტალში საქართველოს მთლიანი საგარეო ვალი 333,4 მილიონი აშშ დოლარით გაიზარდა. 

როგორც უწყება წერს, 2023 წლის 31 მარტის მდგომარეობით საქართველოს მთლიანმა საგარეო ვალმა 23,9 მილიარდი დოლარი შეადგინა, რაც ბოლო ოთხი კვარტლის მშპ-ის 90,2%-ია.

საკურსო ცვლილების გამო საგარეო ვალი 284,8 მილიონი აშშ დოლარით გაიზარდა, ოპერაციული ცვლილებების გამო - 39,9 მილიონი დოლარით, ფასის ცვლილების გამო 6,0 მილიონი დოლარით, ხოლო სხვა ცვლილებების გამო ვალი 3,6 მილიონი დოლარით გაიზარდა. 

ეროვნული ბანკი განმარტავს, რომ მთლიანი საგარეო ვალის სტატისტიკა ჰარმონიზებულია საგადასახადო ბალანსთან და იგი მოიცავს სახელმწიფო და კერძო სექტორის ვალს. 

"სახელმწიფო საგარეო ვალმა შეადგინა 10.8 მლრდ აშშ დოლარი (27.5 მლრდ ლარი), რაც მშპ-ს 40.6 პროცენტია. აქედან სამთავრობო სექტორის ვალია 8.2 მლრდ აშშ დოლარი (21.0 მლრდ ლარი; მშპ-ს 31.0 პროცენტი), ეროვნული ბანკის ვალდებულებები - 908.9 მლნ აშშ დოლარი (2.3 მლრდ ლარი; მშპ-ს 3.4 პროცენტი), ხოლო სახელმწიფო საწარმოების ობლიგაციები და სესხები, შესაბამისად, 434.2 მლნ აშშ დოლარი (1.1 მლრდ ლარი; მშპ-ს 1.6 პროცენტი) და 1.2 მლრდ აშშ დოლარი (3.1 მლრდ ლარი; მშპ-ს 4.6 პროცენტი).

საბანკო სექტორის საგარეო ვალმა შეადგინა 6.5 მლრდ აშშ დოლარი (16.5 მლრდ ლარი; მშპ-ს 24.4 პროცენტი), სხვა სექტორების საგარეო ვალმა - 4.8 მლრდ აშშ დოლარი (12.2 მლრდ ლარი; მშპ-ს 18.0 პროცენტი) და კომპანიათაშორისო ვალმა - 3.5 მლრდ აშშ დოლარი (9.1 მლრდ ლარი; მშპ-ს 13.4 პროცენტი). მთლიანი საგარეო ვალის 88.7 პროცენტი დენომინირებულია უცხოური ვალუტით.

საქართველოს წმინდა საგარეო ვალმა, 2023 წლის 31 მარტის მდგომარეობით, 12.6 მლრდ აშშ დოლარი (32.2 მლრდ ლარი) შეადგინა, რაც ბოლო ოთხი კვარტლის მშპ–ს 47.5 პროცენტია. აქედან, სახელმწიფო სექტორის წმინდა საგარეო ვალი 5.7 მლრდ აშშ დოლარია (14.7 მლრდ ლარი), რაც მშპ-ს 21.7 პროცენტია.

2023 წლის პირველ კვარტალში საქართველოს ეროვნული ბანკის საგარეო ვალი 12.7 მლნ აშშ დოლარით გაიზარდა. აქედან, საკურსო ცვლილების გამო ვალი 9.8 მლნ აშშ დოლარით, ხოლო ოპერაციული ცვლილების გამო 2.9 მლნ აშშ დოლარით გაიზარდა. 2023 წლის პირველი კვარტლის ბოლოს ეროვნული ბანკის მთლიანმა საგარეო ვალდებულებებმა 908.9 მლნ აშშ დოლარი შეადგინა. აქედან, 467.5 მლნ აშშ დოლარი განაწილებული ნასესხობის სპეციალური უფლებაა (ნსუ)1, რომელსაც არ აქვს დაფარვის ვადა და პრაქტიკულად, მისი გადახდის ვალდებულება არ დადგება, სანამ საქართველო არის საერთაშორისო სავალუტო ფონდის წევრი", - წერს ეროვნული ბანკი.