თუ ნიკა მელია მანიფესტს ხელს არ მოაწერს, ვერ იქნება პარტიის წევრი | "ნაციონალურ მოძრაობაში" ისევ დაპირისპირებაა

მანიფესტი, რომელსაც "ნაციონალურ მოძრაობაში" დაძაბულობა უნდა განემუხტა, ჯერჯერობით გამაერთიანებლის როლს ვერ ასრულებს. მიზეზი დოკუმენტის დასკვნით ნაწილში არსებული ჩანაწერია, რომელმაც გუნდში ახალი დაპირისპირება გამოიწვია. მიხეილ სააკაშვილისა და "ნაციონალური მოძრაობის" ერთობლივი მანიფესტი პოლიტსაბჭოს ლეგიტიმურობის აღიარებას ითხოვს, ნიკა მელიას გუნდი კი ამ პუნქტს არ ეთანხმება. 

ლევან ბეჟაშვილმა "მთავარი არხის" ეთერში განაცხადა, რომ პარტიაში ვერ დარჩებიან ის ადამიანები, რომლებიც ერთიანობის მანიფესტს ხელს არ მოაწერენ. 

"ყველა ხვდებით, რომ ამ დოკუმენტის ადრესატები არიან ის ადამიანები, ვინც პარტიის წინააღმდეგ საჯარო, ღია კამპანიას ეწეოდნენ. პირველ რიგში, ხომ ყველა ხვდებით, რომ ამ კამპანიის მთავარი სუბიექტი იყო ნიკა მელია და შესაბამისად, პირველ რიგში, ნიკა მელის ეხება ეს დოკუმენტი, ნიკა მელია თუ მოაწერს და მოაწერდა ხელს ამ დოკუმენტს, ბუნებრივია, ამ შემთხვევაში ყველა ჩამოთვლილი სუბიექტი და ყველა სხვა ადამიანიც მოიაზრებოდა ამ ხელმოწერაში. [...] [თუ მანიფესტს არ მოაწერს ხელს ნიკა მელია, ის იქნება მაინც პარტიის წევრი თუ აღარ იქნება?] არ იქნება, ვერ იქნება პარტიის წევრი, ის ვერ წარმოადგენს და არ წარმოადგენს ენმ-ის ინტერესებს", - თქვა ბეჟაშვილმა.

კობა ნაყოფიამ თქვა, რომ არ იცის სრულად იყო თუ არა მანიფესტის ტექსტი მიხეილ სააკაშვილთან შეთანხმებული, მაგრამ ისურვებდა, რომ მას ყველაფერი ნანახი არ ჰქონდეს. 

პოლიტიკური საბჭოს წევრი, ლაშა ფარულავა ამბობს, რომ მანიფესტზე ხელის არ მოწერა პარტიის წევრებს პარტიის მიღმა ტოვებს.