ვარკეთილში, 2 პირის მკვლელობისთვის დაკავებულს ბრალდება წარუდგინეს | კალანდარიშვილს 16-დან 20 წლამდე, ან უვადო პატიმრობა ემუქრება

საქართველოს პროკურატურამ თბილისში მომხდარი ორი პირის განზრახ მკვლელობის ფაქტზე დაკავებულს  ბრალდება წარუდგინა. საგამოძიებო უწყება დანაშაულის მოტივად ურთიერთშელაპარაკებას ასახელებს: 

"შინაგან საქმეთა სამინისტროს მიერ ჩატარებული გამოძიებით დადგინდა, რომ 5 ივნისს, თბილისში, ბრალდებულმა ურთიერთშელაპარაკების დროს ცეცხლსასროლი იარაღიდან რამდენიმე გასროლით ორ პირს სხეულის სხვადასხვა არეში ჭრილობები მიაყენა. მიყენებული დაზიანებების შედეგად დაზარალებულები ადგილზე გარდაიცვალნენ. 

სამართალდამცველებმა ბრალდებული იმავე დღეს დააკავეს. მას ბრალდება საქართველოს სისხლის სამართლის კოდექსის 109-ე მუხლის „ლ“ ქვეპუნქტებით (ორი პირის განზრახ მკვლელობა) წარედგინა, რაც სასჯელის სახედ და ზომად 16-დან 20 წლამდე ან უვადო თავისუფლების აღკვეთას ითვალისწინებს.

პროკურატურა ბრალდებულისთვის აღკვეთის ღონისძიების სახით პატიმრობის გამოყენების შუამდგომლობით სასამართლოს კანონით დადგენილ ვადაში მიმართავს." ნათქვამია პროკურატურის განცხადებაში. 

შეგახსენებთ, დაკავებულია იური კალანდარიშვილი, რომელსაც მეზობლად მცხოვრები 39 წლის ბაჩო ბაშარულისა და მისი მეგობრის, 40 წლის ნიკა არჩვაძის დამამძიმებელ გარემოებებში განზრახ მკვლელობას ედავებიან. 

კალანდარიშვილის ადვოკატის განცხადებით, მისი დაცვის ქვეშ მყოფი, აუცილებელი მოგერიების ფარგლებში მოქმედებდა.