სპეცრაზმელები დაკავებულ ქალებს სცემდნენ, სექსუალურად ავიწროებდნენ და გაუპატიურებით ემუქრებოდნენ | არასამთავრობოები საგანგაშო ფაქტებს ასაჯაროებენ
გამოქვეყნდა:
პოლიციის მხრიდან ქალი დაკავებულების მიმართ ძალადობასა და სექსუალური მუქარის ფაქტებზე არასამთავრობო ორგანიზაციებმა განცხადება გააკეთეს და კონკრეტული ფაქტები დაასახელეს.
არასამთავრობოები ქალებს მიმართავენ, თუ მსგავს შემთხვევებს მათთანაც ჰქონდა ადგილი, მიმართონ არასამთავრობოების ცხელ ხაზს, მათი ანონიმურობა დაცული იქნება. ამ დროისათვის კი მესამე სექტორს აქციების მონაწილე 10 ქალის დაკავების შესახებ აქვს ინფორმაცია, თუმცა ზუსტი სტატისტიკა რამდენი ქალი დააკავეს აქციების მიმდინარეობისას, არ არსებობს:
"28 ნოემბრის შემდგომ, ქართულ არასამთავრობო ორგანიზაციათა ცხელ ხაზზე შემოვიდა 10 ქალის დაკავების თაობაზე შეტყობინება, თუმცა სამწუხაროდ, ოფიციალური მონაცემებს არარსებობის გამო, ჩვენ არ გვაქვს ზუსტი სტატისტიკა და ინფორმაცია თუ რამდენი ქალი დააკავეს საპროტესტო აქციების მიმდინარეობის დროს.
შემაძრწუნებელია ის გარემოება, რომ აქციაზე დაკავებულმა რამდენიმე ქალმა საჯაროდ ისაუბრა მათ მიმართ დაკავების დროს და შემდგომ პერიოდში, პოლიციის მხრიდან ფიზიკური ძალადობის, არაადამიანური, ღირსების შემლახავი მოპყრობის, სექსუალური შევიწროების და გაუპატიურების მუქარის ფაქტების თაობაზე. ქალების განცხადებით, დაკავების პროცესში სპეცრაზმი ფიზიკურად გაუსწორდა, ემუქრებოდნენ გაუპატიურებით და სიცოცხლის მოსპობთ. გაუპატიურების მუქარის კიდევ უფრო სიცხადისთვის, ადგილი ჰქონდა სპეცრაზმელების მიერ გაუპატიურების აქტის აღწერას უწმაწური სიტყვებით გამოყენების, დაკავების სპეციალური მანქანისკენ წაყვანის მუქარას, რაც მსხვერპლისთვის კიდევ უფრო დამაჯერებელს ხდიდა აღნიშნულ სიტყვებს.
აქციაზე დაკავებული ქალის მიერ გაკეთებული საჯარო განცხადების თანახმად, დაკავების მანქანაში მას არ მისცეს სკამზე დაჯდომის საშუალება, მთელი გზა მუხლებზე დაჩოქილი ამგზავრეს და მასთან ადგილი ჰქონდა სექსუალური შევიწროების ფაქტს. ერთ- ერთი დაკავებული ქალის მიერ გაკეთებული საჯარო განცხადებით, მას პოლიციის განყოფილებაში გადაუღეს ვიდეოები, ამცირებდნენ სექსუალური შინაარსის კომენტარებით.
აქციის მონაწილე ერთ-ერთმა ქალმა, რომელსაც სახეზე დაზიანებები აღენიშნებოდა, საჯაროდ გააკეთა განცხადება , რომ ის აქციის დაშლის დროს პოლიციელებმა თითქოსდა განრიდების მიზნით გაიყვანეს, რის შემდეგაც სცემეს. " აღნიშნა გამართულ ბრიფინგზე ნინო ლომჯარიამ.
