საქართველოს საელჩო საბერძნეთში, ტყის ხანძრებთან დაკავშირებით მიმართვას ავრცელებს და საქართველოს მოქალაქეებს სიფრთხილისკენ მოუწოდებს:
ძვირფასო თანამემამულეებო! ამჟამად ჩრდილოეთ ატიკაში მიმდინარე ხანძრის გამო, მოგიწოდებთ დაემორჩილოთ საბერძნეთის შესაბამისი უწყებების მიერ გავრცელებულ მითითებებს: აუცილებლობის გარდა ნუ გადაადგილდებით ჩრდილოეთი ატიკის რეგიონში. ამასთან, რეკომენდირებულია, დახუროთ კარებები და ფანჯრები.
შეგახსენებთ, რომ უწყვეტ რეჟიმში მოქმედებს საელჩოს ცხელი ხაზი 6995779793.
საბერძნეთის სახელმწიფო გთავაზობთ შემდეგ მომსახურებას: ატიკას მაცხოვრებლებო, თუ ხანძრის გამო სახლში ვერ მიდიხართ, დარეკეთ 1135-ზე. მოგაწვდით ინფორმაციას თუ რომელ სასტუმროში განთავსდეთ. სახელმწიფო სრულიად დაფარავს ხარჯებს.
აქვე მიგითითებთ შემდეგ ტელეფონის ნომრებს: საბერძნეთის პოლიცია - 100, სახანძრო სამსახური - 199, სასწრაფო დახმარება - 166 - ნათქვამია საელჩოს ინფორმაციაში.
შეგახსენებთ, საბერძნეთში ტყის ძლიერ ხანძრებს უკვე რამდენიმე დღეა ებრძვიან. ბოლო მონაცემებით, ცეცხლმა უკვე ათენის გარეუბნებამდე მიაღწია.
ოფიციალური ინფორმაციით, ქვეყანაში ხანძრის 80-მდე კერაა, ხანძრების მიზეზად ჰაერის მაღალი ტემპერატურა და ქარი სახელდება.
ევაკუირებულია რამდენიმე პატარა დასახლება, მაცხოვრებლები სხვადასხვა სასტუმროებში არიან გადაყვანილნი. გარდაცვლილების შესახებ ინფორმაცია არ ვრცელდება.