"რუსი ოკუპანტების მიერ რუბეჟნოეს "გათავისუფლების" შესახებ ინფორმაცია ყალბია" - სერგეი გაიდაი
გამოქვეყნდა:
"რუსი ოკუპანტების მიერ რუბეჟნოეს "გათავისუფლების" შესახებ გავრცელებული ინფორმაცია ყალბია, ქალაქი კვლავ უკრაინის კონტროლის ქვეშ რჩება", - ამის შესახებ ინფორმაციას, ლუგანსკის ოლქის სამხედრო ადმინისტრაციის ხელმძღვანელი სერგეი გაიდაი Telegram არხზე ავრცელებს.
მისივე თქმით, რუსულმა პროპაგანდამ ამგვარი ყალბი ინფორმაცია უკვე მესამედ გაავრცელა.
"აბსურდი: "რუსეთის შეიარაღებული ძალების სპეცოპერაციის 56-ე დღე აღინიშნა რუბეჟნოეს გათავისუფლებით", - განაცხადეს რუსეთის მკვლელობის სამინისტროში.
სიმართლე: უკრაინის გენერალურმა შტაბმა აღნიშნა, რომ 56-ე დღეს მტერი ცდილობდა ფეხის მოკიდებას რუბეჟნოეს დასავლეთ და ჩრდილო-დასავლეთ ნაწილში, თუმცა დამარცხდა.
რუსული ყალბი ცნობების თანახმად, ოკუპანტების მხრიდან ეს უკვე რუბეჟნოეს მესამე "გათავისუფლებაა". შესაძლოა, უახლოეს მომავალში რუსულმა პროპაგანდამ მეოთხედაც განაცხადოს რუბეჟნოეს "გათავისუფლების" შესახებ", - წერს სერგეი გაიდაი.
