საგარეჯოში დაჭრილი 24 წლის ახალგაზრდას მდგომარეობა სტაბილურად მძიმეა - რას ამბობენ კლინიკაში

საგარეჯოს "ჯეო ჰოსპიტალსში" ამ დროისათვის მკურნალობას 3 პაციენტი განაგრძობს.

როგორც კლინიკაში "მთავარი არხის" ვებგვერდს განუცხადეს, 24 წლის ახალგაზრდა კაცი მიღებული დაზიანებების სიმძიმიდან გამომდინარე, სტაბილურად მძიმე რჩება, მაგრამ ძირითადი მაჩვენებელი ნორმასთან ახლოსაა და მისი სიცოცხლე შენარჩუნებელია. მისი მდგომარეობა განსაკუთრებულ რეჟიმშია აყვანილი ექმიების მხრიდან. კლინიკაში აღნიშნავენ, რომ ახალგაზრდა კაცი ამ დრომდე რეანიმაციაშია მოთავსებული. 

ამასთან, მკურნალობა უგრძელდება კიდევ 2 პაციენტს, რომლებსაც ცეცხლსასროლი იარაღით ჭრილობა ჰქონდათ მიყენებული ქვედა კიდურებზე. მათ გაუკეთდათ ოპერაციული ჩარევა და ამ ეტაპზე მკურნალობას სტაციონარულ რეჟიმში გადიან. სამედიცინო დაწესებულებაში ამბობენ, რომ მათი მდგომარეობა დამაკმაყოფილებელია. 

შეგახსენებთ, რომ 20 იანვარს გვიან ღამით საგარეჯოში, შეიარაღებულმა პირმა, ერთ-ერთი საცხოვრებელი კორპუსის აივნიდან მოქალაქეებს ავტომატით ცეცხლი გაუხსნა. შინაგან საქმეთა სამინისტროს ინფორმაციით, დაიღუპა 5 ადამიანი, მათ შორის ერთი პოლიციელი. დაჭრილია კიდევ 5 ადამიანი, მათ შორის ერთის მდგომარეობა მძიმეა. არსებული ცნობით, თავდამსხმელმა სიცოცხლე თვითმკვლელობით დაასრულა, ის სპეცრაზმს ბინაში უკვე გარდაცვლილი დახვდა.