სასწრაფო დახმარების თანამშრომლები ადმინისტრაციის შენობასთან საპროტესტო აქციას მართავენ - ვითარება ადგილზე

ხმაური საგანგებო სიტუაციებისა და გადაუდებელი დახმარების ცენტრის მთავარ ოფისში - სასწრაფო-სამედიცინო დახმარების თანამშრომლები საპროტესტო აქციას მართავენ. ისინი ხელფასების მომატებას, სამუშაო პირობების გაუმჯობესებასა და ზემდგომი პირების გათავისუფლებას ითხოვენ.

ადგილზე უწყვეტი აქცია უკვე 6 დღეა მიმდინარეობს, ამ დღეების განმავლობაში სასწრაფოს თანამშრომლები ღამეს ადმინისტრაციაში ათევდნენ, თუმცა, მათი თქმით, დღეს ისინი შენობაში დაცვამ აღარ შეუშვა. აქციაზე იმყოფებიან პროფკავშირების წევრებიც.

"ჩვენ აქ გვაქვს უწყვეტი აქცია. დღეს მე-6 დღეა. გუშინ აქ ღამე გავათენე, გამოვედი დაახლოებით 1 საათი, დაბრუნებისას ვიღაც გაურკვეველი ადამიანები დგანან, არ გვიშვებენ, არ ვიცით ვინ არიან, სახელ-გვარს არ ამბობენ, არც საბუთებს გვაჩვენებენ. მოთხოვნა ხელფასების მომატებაა. აქციები დაწყებულია მაისის მერე, უწყვეტ რეჟიმში აქცია უკვე 6 დღეა რაც არის", - თქვა აქციის ერთ-ერთმა მონაწილემ.

ჯანდაცვის სამინისტროს გადაწყვეტილებით, იანვრის თვიდან სასწრაფო-სამედიცინო დახმარების მუშაკებს ანაზღაურება 100 ლარით გაეზარდათ, თუმცა აქციის მონაწილეები ამბობენ, რომ ქვეყანაში არსებული ეკონომიკური ვითარებიდან გამომდინარე, ეს თანხა მიზერულია.

ცნობისთვის, სასწრაფოს თანამშრომლებს არც სააგენტოს დირექტორი და არც მთავრობიდან გამოხმაურებია.