NGO-ები აქციებზე დაკავებულებთან დაკავშირებით შსს-ს, პროკურატურას და საგამოძიებოს მიმართავენ
გამოქვეყნდა:
არასამთავრობო ორგანიზაციები 7-9 მარტს პარლამენტთან აქციაზე დაკავებულ პირებთან დაკავშირებით ერთობლივ განცხადებას ავრცელებენ.
არასამთავრობო ორგანიზაციების თქმით, მიუხედავად იმისა, რომ დაკავებული ყველა პირი ამ დროისთვის გათავისუფლებულია, ეს არ გულისხმობს სამართალდარღვევის საქმის წარმოების შეწყვეტას.
არასამთავრობოები შესაბამის უწყებებს მოუწოდებენ შეწყდეს დაკავებულების საქმის წარმოება:
"შინაგან საქმეთა სამინისტროს განცხადებით, აქციის მიმდინარეობისას ადმინისტრაციული წესით დაკავებული ყველა პირი დროებითი მოთავსების იზოლატორიდან გათავისუფლდა. ადმინისტრაციული დაკავებიდან მათი გათავისუფლება არ გულისხმობს სამართალდარღვევის საქმის წარმოების შეწყვეტას. შესაბამისად, დაკავებიდან გათავისუფლების მიუხედავად, მათ მიმართ ადმინისტრაციული სამართალდარღვევის საქმის წარმოება ამ დრომდე მიმდინარეობს.
2023 წლის 2-3 მარტსა და 7-9 მარტს გამართულ საპროტესტო აქციებზე პოლიციამ, ადმინისტრაციული წესით, ჯამში 169 პირი დააკავა.
მოვუწოდებთ:
შინაგან საქმეთა სამინისტროს - აქციის მიმდინარეობისას დაკავებული ყველა პირის მიმართ, რომელთა საქმეებიც ამ დრომდე სასამართლოს არ განუხილავს, შეწყვიტოს ადმინისტრაციული სამართალდარღვევის საქმის წარმოება;
პროკურატურას - გამოიყენოს კანონმდებლობით გათვალისწინებული პროკურორის პროტესტით მიმართვის შესაძლებლობა, რათა გაუქმდეს სასამართლოს მიერ დაჯარიმების შესახებ მიღებული დადგენილებები;
სპეციალურ საგამოძიებო სამსახურს - უზრუნველყოს სამართალდამცავების მხრიდან არაპროპორციული ძალის გამოყენების, თვითნებური დაკავებების, დაკავებულთა მიმართ ძალადობისა და სხვა შემთხვევების სრულყოფილი და ობიექტური გამოძიება", - ნათქვამია განცხადებაში.
ერთობლივ განცხადებას ხელს აწერენ:
- საქართველოს ახალგაზრდა იურისტთა ასოციაცია;
- საერთაშორისო გამჭვირვალობა-საქართველო;
- ადამიანის უფლებათა ცენტრი / Human Rights Center;
- საქართველოს დემოკრატიული ინიციატივა / Georgian Democracy Initiative;
- Women's Initiatives Supporting Group;
- სამართლიანი არჩევნები (ISFED);
- Rights Georgia / უფლებები საქართველო;
- ღია საზოგადოების ფონდი I Open Society Georgia Foundation;
- პარტნიორობა ადამიანის უფლებებისთვის-PHR.
