სიცრუის მინისტრია, არც მოგვისმინა, სახეში არც შემოგვხედა - აქონდროპლაზიით დაავადებული ბავშვების მშობლები აზარაშვილზე

"აქონდრპოლაზიით დაავადებული ბავშვებისთვის საჭირო მედიკამენტებს არცერთი ქვეყანა არ აფინანსებს" - ამ განცხადებით დატოვა ჯანდაცვის მინისტრმა იშვიათი გენეტიკური დაავადების მქონე ბავშვების მშობლებთან შეხვედრა პარლამენტში.

ზურაბ აზარაშვილი საკანონმდებლო ორგანოში ფრაქცია "ლელომ" დაიბარა.

"საბჭოს ფორმატში გაიმართა არაერთხელ ეს მსჯელობა და ბოლო შეხვედრა იყო 28 თუ 29 მარტს და გადაწყვეტილება, რომ რაღაცა ვადაში რამე მედიკამენტი შევიძინოთ და შემოვიტანოთ, ესეთი გადაწყვეტილება არ მიგვიღია",- თქვა ზურაბ აზარაშვილმა.

შეხვედრით კმაყოფილი დარჩნენ  მშობლები, მათი თქმით, მინისტრმა არცერთ კითხვას პასუხი არ გასცა. ახლა ისინი პრემიერმინისტრთან შეხვედრასა და მთავრობის ადმინისტრაციასთან აქციებს აანონსებენ. 

"მან მხოლოდ თავის სასურველ კითხვებს უპასუხა და ძალიან ცუდია, რომ გაზეპირებული ფრაზებით ისაუბრა და თქვა, რომ ის არ არის გადამწყვეტი პირი და იმიტომ არ გვხვდება, რომ არ იღებს თავის თავზე. კიდევ დიდი სიცრუე თქვა, რომ გერმანიაში შეაჩერეს, ეს არის ძალიან დიდი სიცრუე. მისმა მოადგილემ თქვა, რომ ჰქონდა კომუნიკაცია: საფრანგეთთან, ესპანეთთან, იტალიასთან. ესენი უბრალოდ დროს წელავენ, ვითომდა, არ ასახელებენ ფინანსებს, მაგრამ ზუსტად ვიცი, რომ არ ემეტებათ ეს თანხები ჩვენი შვილებისთვის. მინისტრი იგივეს ლაპარაკობს, რომ ვითომ არ ფინანსდება, ტყუილია, ეს არის სიცრუის მინისტრი, არ გვისმენს, არც მოგვისმინა, სახეში არც შემოგვხედა, ჩვენ არ გვთვლის ადამიანებად",- ამბობს ერთ-ერთი მშობელი. 

ცნობისთვის, აქონდროპლაზია გენეტიკური დაავადებაა, როცა ბავშვის სხეული ასიმეტრიულად ვითარდება და ის დაახლოებით 25 ათასიდან ერთ შემთხვევაში ვლინდება. წამალი, რომელიც ბავშვებისთვის სასიცოცხლოდ მნიშვნელოვანია დღეს საქართველოში არ შემოდის. მშობლები ამბობენ, რომ რომც შემოდიოდეს, დახმარების გარეშე, პირადი სახსრებით ვერ შეძლებენ მის შეძენას.