"ჩვენ გვჭირდება დოკუმენტი" - დედების პასუხი ჯანდაცვის სამინისტროს შემოთავაზებაზე

"ცოტა უფრო სერიოზული სახე უნდა მიეცეს ამ შემოთავაზებას" -ასე პასუხობს ჯანდაცვის დღევანდელ შემოთავაზებასა და მინისტრის მოადგილის განცხადებას, აქონდროპლაზიის სინდრომის მქონე ბავშვის დედა, მაკუნა გოჩიაშვილი "შაბათის მთავარის" ეთერში და ამბობს, რომ მათ სიტყვიერი დაპირებების დიდი გამოცდილება აქვთ და ახლა უკვე ოფიციალური დოკუმენტი სჭირდებათ:

"ეს არის პროცესი მედიკამენტის დამკვიდრებისა ქვეყანაში და იქიდან გამომდინარე, რომ ჩვენთვის ვადები ძალიან მნიშვნელოვანია და გვაქვს მტკივნეული გამოცდილება დროში გაწელვის, მტკივნეული გამოცდილება სიტყვის სიტყვად დარჩენის, ჩვენი მოთხოვნაა, რომ პრემიერთან რომ შევიტანეთ განცხადება, ამ ვადაში, 1-ელ სექტემბრამდე მოეწეროს ხელი იმას, რომ ეს პროტოკოლები იყოს შემუშავებული და მედიკამენტი არაუგვიანეს 1-ელი სექტემბრისა დანერგილი ქვეყანაში. ეს ვადა არის ჩვენთვის სიმშვიდის გარანტი. გვჭირდება დოკუმენტი იმისა, რაც დღეს თქვეს. რაც განაცხადა ქალბატონმა თამარმა, არის ჩვენი მოთხოვნების დაკმაყოფილება, მაგრამ მხოლოდ სიტყვებით. ჩვენ დოკუმენტი გვჭირდება" ამბობს გოჩიაშვილი

გოჩიაშვილის თქმით, დოკუმენტზე უნდა იყოს გადაწყვეტილების მიმღები პირის ხელმოწერა, გაწერილი კონკრეტული ვადები და მედიკამენტისთვის თანხების გამოყოფა ამავე წლის ბიუჯეტში. 

სამინისტრო მზადაა დაჩქარებულად შექმნას აქონდროპლაზიის მართვის პროტოკოლი და გაიდლაინი - ეს განცხადება ჯანდაცვის მინისტრის მოადგილემ, თამარ გაბუნიამ დღეს, დედების პროტესტის 2 კვირის შემდეგ გააკეთა და აღნიშნა, რომ ორგანიზაციის "პატარა ადამიანები საქართველოდან" წარმომადგენლებს, შესაძლებლობა ექნებათ, ჩაერთონ როგორც იშვიათი დაავადებების საკითხებზე მომუშავე საკოორდინაციო საბჭოს, ისე აქონდროპლაზიის საკითხებზე მომუშავე მულტიდისციპლინურ ჯგუფის მუშაობაში.