"შემაშფოთებელია შსს-ს მხრიდან აქციის მონაწილეების კანონსაწინააღმდეგო დაკავების ტენდენციური ხასიათი" | TI და ISFED
გამოქვეყნდა:
არასამთავრობო ორგანიზაციები "საერთაშორისო გამჭვირვალობა-საქართველო" და "სამართლიანი არჩევნებისა და დემოკრატიის საერთაშორისო საზოგადოება" 3 ივნისს ბათუმში აქციაზე ბანერების გამო მოქალაქეების დაკავებას გამოეხმაურნენ.
ორგანიზაციები შსს-ს მოუწოდებენ შეწყვიტოს მშვიდობიანი აქციის მონაწილეების დაკავება, გამოხატვის თავისუფლების უკანონო შეზღუდვა და დაუყოვნებლივ გაათავისუფლოს ყველა დაკავებული.
"შემაშფოთებელია, რომ შინაგან საქმეთა სამინისტრო კვლავ განაგრძობს მშვიდობიანი აქციის მონაწილეების უკანონოდ დაკავების პრაქტიკას, "რაც გამოხატვის თავისუფლებაში უხეში ჩარევაა და ეწინააღმდეგება როგორც საქართველოს კონსტიტუციას, ისე საერთაშორისოდ აღიარებულ სტანდარტებს
როგორც ცნობილია, 2 ივნისს, თბილისში პარლამენტის წინ, მსგავსი შინაარსის ბანერების გამო, მშვიდობიანი შეკრების 7 მონაწილე დააკავეს, რომლებიც თელავის, გურჯაანისა და დუშეთის დროებითი მოთავსების იზოლატორებში გადაიყვანეს. შსს-ს ამ დრომდე, დაკავებულთა რეგიონალურ იზოლატორებში გადაყვანის საჭიროებასთან დაკავშირებით რაიმე განმარტება არ გაუკეთებია. რაც ამძაფრებს ეჭვებს, რომ ამ გადაწყვეტილების მიზეზი, დაკავებულთათვის დაცვის უფლების შეზღუდვა და ადვოკატებთან შეუფერხებელი კომუნიკაციის ხელშეშლა შეიძლება ყოფილიყო. უნდა აღინიშნოს ისიც, რომ დაკავებულებს დაუსაბუთებლად, დაკავების ვადა 48 საათამდე გაუხანგრძლივდათ.
შემაშფოთებლად მიგვაჩნია, შსს-ს მხრიდან მშვიდობიანი პროტესტის მონაწილეების თვითნებური და კანონსაწინააღმდეგო დაკავების ტენდენციური ხასიათი.
მოვუწოდებთ შსს-ს, შეწყვიტოს მშვიდობიანი აქციის მონაწილეების დაკავება, გამოხატვის თავისუფლების უკანონო შეზღუდვა და დაუყოვნებლივ გაათავისუფლოს ყველა დაკავებული", - ნათქვამია განცხადებაში.
ცნობისთვის, 3 ივნისს ბათუმში ერას მოედანზე გამართულ აქციაზე ბანერების გამო 6 პირი დააკავეს, მათ შორის 2 არასრულწლოვანი. დაკავებულებიდან 3 ამ დრომდე დროებითი მოთავსების იზოლატორში რჩება.
ბათუმში აქციის მონაწილეები სოლიდარობას უცხადებდნენ 2 ივნისს თბილისში რუსთაველის გამზირზე ბანერების გამო დაკავებულებს. პოლიციამ რუსთაველზე 7 პირი დააკავა.
