"ნუ ცდიან ჩვენს მოთმინებას" - აქონდროპლაზიის სინდრომის მქონე ბავშვების დედებს ისევ არ აქვთ პასუხი, როდის შემოიტანენ წამალს

აქონდროპლაზიის მქონე ბავშვების მშობლები ამბობენ, რომ კვლავ უცნობია, როდის შემოვა საქართველოში მათი შვილებისთვის საჭირო მედიკამენტი.

ჯანდაცვის სამინისტრომ წამლის მწარმოებელ კომპანიასთან მოლაპარაკებები გასული თვის დეკემბერში დაიწყო, თუმცა ამ დრომდე არ დაწყებულა მედიკამენტის საქართველოში დარეგისტრირება, აქონდროპლაზიის მქონე ბავშვების გამოკვლევები და ექიმების გადამზადება.

მშობლები ამბობენ, რომ თუ მათი მოთხოვნები არ დაკმაყოფილდება, ქუჩაში პროტესტი გაგრძელდება.

"ნუ ცდიან ჩვენს მოთმინებას, ნუ ელოდებიან იმას, რომ ავყვირდებით და რაღაც რადიკალურ ზომებამდე მივალთ მერე დაიწყებენ ვითომდა მოქმედებას. ის ტრავმა ჩვენ არ გაგვსვლია, რაც 19 დღე ქუჩაში გავატარეთ. ისედაც ამ უფროსი ბავშვების დედებს, ვისაც ამდენი წელი მედიკამენტი არ გვქონდა, უიმედოდ ვიყავით და დღეს მედიკამენტია და იმიტომ ვერ იღებენ რადგან ასე ხანგრძლივდება, და ასე გაჭიანურდა და დამამცირებელ მდგომარეობაში გვიწევს მედიკამენტის მოთხოვნა, ამას რომ ცდიან. ჩვენი, ყველა მშობლის ერთი პოზიციაა - როდის შემოვა მედიკამენტი საქართველოში", - თქვა ქეთევან ბეგიაშვილმა.

გასულ თვეს აქონდროპლაზიის მქონე ბავშვების მშობლები კანცელარიასთან აქციებს მართავდნენ და ღამეებს ათევდნენ. მშობლები საქართველოში ბავშვებისთვის საჭირო მედიკამენტის შემოტანასა და დაფინანსება ითხოვდნენ. 20 დღიანი პროტესტის შემდეგ ჯანდაცვის სამინისტროს წარმომადგენლებმა მშობლებთან რამდენიმე შეხვედრა გამართეს.

მშობლების თქმით, შეხვედრაზე მათ მიიღეს დაპირება, რომ როგორც კი ყველაფერი იქნება მზად პრეპარატ "ვოსორიტიდის" შემოსატანად, ფინანსთა სამინისტრო შესაბამის თანხებს გამოყოფს. თუმცა როგორც ირკვევა, ზუსტი თარიღი ჯერ ისევ უცნობია. 

ფოტო: ფორმულა