თბილისის საჯარო საბავშვო ბაგა-ბაღებში 2023-2024 სასწავლო-სააღმზრდელო წლისთვის რეგისტრაციის პირველი ეტაპი 10 ივლისს, 10:00 საათზე დაიწყება და 16 ივლისის 00:00 საათამდე გაგრძელდება.
თბილისის მერმა, კახა კალაძემ დღეს დედაქალაქის მთავრობის სხდომაზე განაცხადა, რეგისტრაცია წარიმართება ელექტრონულად, სამ ეტაპად, თბილისის საბავშვო ბაგა-ბაღების მართვის სააგენტოს ვებგვერდზე www.kids.org.ge.
პირველ ეტაპზე, დარეგისტრირდებიან მიზნობრივი სოციალური ჯგუფის წარმომადგენელი ბავშვები:
- ა) სოციალურად დაუცველი ოჯახის წევრი ბავშვები, რომელთა სარეიტინგო ქულა სოციალურად დაუცველთა ერთიან ბაზაში არ აღემატება 100 000 ქულას;
- ბ) სპეციალური საგანმანათლებლო საჭიროების მქონე ბავშვები;
- გ) ჩვილ ბავშვთა სახლის ბენეფიციარები;
- დ) მარტოხელა მშობლის შვილი;
- ე) მრავალშვილიანი ოჯახის შვილები ან/და ნაშვილები;
- ვ) სამხედრო მოსამსახურეების შვილები;
- ზ) საჯარო ბაღის აღსაზრდელთა დედმამიშვილები;
- თ) საჯარო ბაღებში დასაქმებულ თანამშრომელთა შვილები;
მეორე ეტაპზე დარეგისტრირდებიან ქალაქ თბილისის მუნიციპალიტეტის ტერიტორიაზე რეგისტრირებული ბავშვები.
კალაძის თქმით, მეორე ეტაპი დაიწყება 17 ივლისს, 10:00 საათზე და 24 ივლისის 00:00 საათამდე გაგრძელდება.
რაც შეეხება მესამე ეტაპს, თბილისის მერის განმარტებით, ის გულისხმობს საყოველთაო რეგისტრაციას, რომელიც 25 ივლისს, 10:00 საათზე დაიწყება.
"რეგისტრაციის გავლას შეძლებს ყველა ის ბავშვი, რომელიც სასწავლო- სააღმზრდელო წლის დასაწყისში, 18 სექტემბრის მდგომარეობით შეუსრულდება ორი წელი. იმ შემთხვევაში, თუ მშობელი რაიმე მიზეზით ვერ ახერხებს ბავშვის ელექტრონულ რეგისტრაციას, შეუძლია განცხადებით მიმართოს სასურველ საბავშვო ბაგა-ბაღს", - განაცხადა კახა კალაძემ.
