ონის მერის ინფორმაციით, შოვიდან მოქალაქეების ევაკუაცია დაიწყო. სერგო ხიდეშელის კომენტარს "პირველ არხი" ავრცელებს. მისი თქმით, დაღამებამდე მოქალაქეების უსაფრთხო ადგილზე გაყვანა უნდა მოხერხდეს.
მისივე თქმით, სტიქიის შედეგად წაღებულია რამდენიმე კოტეჯი, თუმცა მას არ აქვს ინფორმაცია იყვნენ თუ არა ამ კოტეჯებში მოქალაქეები.
„სავარაუდოდ, მაღალ მთებში მოხდა მდინარის დაგუბება, რამაც მეწყრული პროცესი გამოიწვია. სტიქია არის მასშტაბური. პირველ ეტაპზე ყველაზე მნიშვნელოვანია მოქალაქეების უსაფრთხოება და ამაზე ზრუნვა. უკვე ადგილზე იმყოფება ვერტმფრენი და დაწყებულია მოქალაქეების ევაკუაცია. ჩემი აზრით, მოვასწრებთ ამ პირობებში, დაბნელებამდე მოქალაქეების გამოყვანას უსაფრთხო ადგილზე. რამდენიმე კოტეჯი წაღებულია, თუმცა რამდენად იყვნენ იქ მოქალაქეები, ვერ მოგახსენებთ. ადგილზე მობილიზებულები არიან შესაბამისი სამსახურები, მათ შორის სამაშველო სამსახურის ხელმძღვანელი, სამაშველო სამსახურის თანამშრომლები, სასაზღვრო პოლიციის თანამშრომლები, შსს-ს დანაყოფები. მუნიციპალიტეტის მერიის მხრიდან მოხდება მოქალაქეების დაბინავება, პირველ ეტაპზე, ქალაქ ონის ტერიტორიაზე არსებულ სხვადასხვა სასტუმროში“, – განაცხადა ხიდეშელმა.
შეგახსენებთ, შოვში, სასტუმრო "სანსეტ შოვის" ტერიტორიაზე რამდენიმე საათის წინ მეწყერი ჩამოწვა. დამსვენებლებს პირველადი დახმარება სასტუმროს ადმინისტრაციამ გაუწია და შენობიდან გამოსვლაში დაეხმარა. არსებული ინფორმაციით, სტიქიის ზონაში 16 ადამიანი იყო მოყოლილი, მათ შორის, ბავშვებიც. შსს-მ ადგილზე 2 ვერტმფრენი გაგზავნა.
