შოვში სტიქიის შედეგად დაღუპული 11 ცხედრიდან 6 ამოცნობილია | საკოორდინაციო შტაბის წევრი

საქართველოს მთავრობის ადმინისტრაციის რეგიონებთან ურთიერთობის დეპარტამენტის ხელმძღვანელმა, ლერი ბარნაბიშვილმა, განაცხადა, რომ შოვში სტიქიის შედეგად გარდაცვლილი 11 ცხედრიდან 6-ის ცხედარი ამოცნობილია. 

გარდა ამისა, მისივე თქმით,  ცხედრები დაზიანებულია, ამიტომ აღებული იქნება დნმ-ის ანალიზიც და შესაბამისად, ჩატარდება ყველა პროცედურა მათი ვინაობის დასადგენად.

"როგორც მოგეხსენებათ, გზა იჭრება, რადგან ამ მეწყრულ მასა ორივე მხრიდან მიუდგნენ მაშველები. დაახლოებით რვა ერთეული ტექნიკა მუშაობს უკვე ერთ მხარეს, იმ ლოკაციაზე, სადაც ძირითადად იქნა გუშინ ნაპოვნი ცხედრები. მძიმე ტექნიკა მუშაობს სამაშველო სამსახურის ქვეითებთან ერთად, ვინაიდან, ჩვენ სამძებრო სამუშაოებს ვახორციელებთ იმ დათქმით, რომ უნდა ვიპოვოთ ცოცხალი ადამიანები და სამწუხაროდ, შესაძლოა, იყოს გვამებიც. ამიტომ სამუშაოები მიმდინარეობს ფრთხილად. ცოცხალი ძალის თანდასწრებით მძიმე ტექნიკასთან ერთად.

რაც შეეხება გუშინდელ მიცვალებულებს, 11-დან ამ ეტაპზე, როგორც ვიცი, ამოცნობილია ექვსი პიროვნება. ისინი იმყოფებიან პროზექტურაში და მიმდინარეობს ასევე დამატებითი სამუშაოები დანარჩენების ამოსაცნობად. სამწუხაროდ, ისეთ გარემოში იქნა აღმოჩენილი ცხედრები, რომ ისინი დაზიანებულია, ამიტომ აღებული იქნება დნმ-ის ანალიზიც და შესაბამისად, ჩატარდება ყველა პროცედურა მათ ამოსაცნობად.

გუშინ პრემიერ-მინისტრის გადაწყვეტილებით, სამუშაოებში ჩაერთო თავდაცვის სამინისტროს ძალები. ქვეითი მაშველები იქ იმყოფებიან თავდაცვის სამინისტროს შესაბამის დანაყოფებთან ერთად. ასევე მობილიზებულია დამატებითი ტექნიკა და მეორე მხრიდან დღეს გაიჭრება მეწყრულ მასასთან მისასვლელი გზა. კოტეჯებთან გუშინაც მუშაობდა ცოცხალი ძალა, დღესაც მუშაობს და მძიმე ტექნიკაც ახლოსა და მალე მივუახლოვდებით იმ ადგილს, სადაც იყო ეს ყველაფერი," - ამბობს ბარნაბიშვილი. 

ცნობისთვის, ონის მუნიციპალიტეტში, სტიქიის ზონაში, მეხანძრე-მაშველების მიერ ძებნა-შველის ღონისძიების ფარგლებში 11 ადამიანის ცხედარია ნაპოვნი.  

დაკარგული მოქალაქეების ძებნის სამუშაოები მესამე დღეა უწყვეტ რეჟიმში მიმდინარეობს. სამუშაოებში ჩართულია საგანგებო სიტუაციების მართვის სამსახურის მეხანძრე- მაშველები, პოლიციის დანაყოფები, დრონები, სპეცტექნიკა და სასაზღვრო პოლიციის ვერტმფრენი. ასევე, სამუშაოებში ჩართულია საგანგებო სიტუაციების მართვის სამსახურის კინოლოგთა ჯგუფი.