PISA-ს კვლევით, წაკითხულის გააზრებაში საქართველო 81 ქვეყანას შორის 67-ე ადგილზეა
გამოქვეყნდა:
PISA-ს განათლების კვლევის მიხედვით, საქართველო, წაკითხულის გააზრებაში, 81 ქვეყანას შორის 67-ე ადგილზეა, მათემატიკაში მე-60, საბუნებისმეტყველო მეცნიერებებში კი 66-ე. კვლევის თანახმად ირკვევა, რომ საქართველოს 2022 წლის შედეგები, 2018 წელთან შედარებით, მათემატიკასა და კითხვაში გაუარესდა, საბუნებისმეტყველო მეცნიერებებში კი მცირედით გაუმჯობესდა.
კვლევის მიხედვით, მათემატიკაში საქართველოს მაჩვენებელი 8 ქულით გაუარესდა და ამჟამად 390 ქულა აქვს, კითხვის მაჩვენებელი კი 6 ქულით 374 ქულამდე შემცირდა, 1 ქულით გაიზარდა საბუნებისმეტყველო მეცნიერებების ქულა და ის ახლა 384-ს შეადგენს.
სამივე ნაწილში, საქართველო ჩამორჩება OECD-ის საშუალო მაჩვენებლებს. მათემატიკაში OECD-ის საშუალო მაჩვენებელი 472, კითხვაში - 476, ხოლო საბუნებისმეტყველო მეცნიერებებში 485 ქულაა.
ასევე კვლევის მიხედვით, საქართველოში კერძო სკოლების მოსწავლეები სტატისტიკურად მნიშვნელოვნად მაღალ შედეგებს აღწევენ საჯარო სკოლის მოსწავლეებთან შედარებით, როგორც მათემატიკაში, ასევე კითხვასა და საბუნებისმეტყველო საგნებში.
სკოლის ტიპების მიხედვით, შედეგები ასეთია:
- მათემატიკა: კერძო - 445 ქულა, საჯარო - 384 ქულა;
- კითხვა: კერძო - 426 ქულა, საჯარო - 369 ქულა;
- საბუნებისმეტყველო საგნები: კერძო - 436 ქულა, საჯარო - 379 ქულა.
ასევე კვლევაში საქართველო იმ ქვეყნების ჩამონათვალში მოხვდა, სადაც სქესის მიხედვით გოგოების შედეგები ბიჭებისას აღემატება .
PISA 2022-ში მონაწილეობდა 81 ქვეყნისა და ეკონომიკის დაახლოებით 690,000 მოსწავლე, რაც საბოლოოდ შეადგენს დაახლოებით 29 მილიონ 15 წლის მოზარდს.
ავტორი: ნინი ჟიჟიაშვილი
