ტახტისძირიდან ოკუპანტების მიერ გატაცებული კაცი რეგიონში დასავლეთიდან იყო ჩასული | რას ამბობენ ადგილობრივები
გამოქვეყნდა:
ჩვენთან ერთად მოიპოვეთ თავისუფლება!
ქარელის მუნიციპალიტეტის სოფელ ტახტისძირის მიმდებარედ ოკუპანტებმა უკანონოდ 35 წლამდე კაცი დააკავეს. შემთხვევა გუშინ მოხდა. "მთავარი არხის" ინფორმაციით, კაცი ადგილობრივი არაა და ის რეგიონში დასავლეთიდან იყო ჩასული, თუმცა რა მიზნით, ან რა ვითარებაში მოხდა მისი გატაცება, უცნობია.
"ბიჭებმა თქვეს ავნეველი ყოფილა ვიღაც, უნდა ავიდე ავნევშიო, ასე უნდა გადასულიყო ვითომ, აქეთ მხარეს დაუჭერიათ, იქით არ იყო გადასული ჯერ. [...] ვინ აკონტროლებს მაგათ, როცა უნდა გადმოვლენ, ვერც პოლიცია დაიჭერს მაგათ, ვერც ვერავინ, როგორც უნდათ, თავიანთ ნებაზე არიან", - ყვება ადგილობრივი.
მოსახლეობა ამბობს, რომ ოკუპანტებს მიტაცებული აქვთ სოფლის სახნავ-სათესი მიწები და საძოვრები, იმ შემთხვევაში კი თუ ადგილობრივები ე.წ. საზღვარს მიუახლოვდებიან, აკავებენ.
სახელმწიფო უსაფრთხოების სამსახურის ცნობით, გააქტიურდა ევროკავშირის სადამკვირვებლო მისიის მიერ ოპერირებული „ცხელი ხაზი“. ინფორმაცია უკანონო დაკავების მორიგი ფაქტის შესახებ დაუყოვნებლივ ეცნობა ჟენევის საერთაშორისო დისკუსიების თანათავმჯდომარეებსა და საერთაშორისო პარტნიორებს.
