საბავშვო ბაღებში ბავშვებს არ აქვთ სათამაშოები, საჭირო ინფრასტრუქტურა და ჰიგიენა - ომბუდსმენის ანგარიში
გამოქვეყნდა:
ჩვენთან ერთად მოიპოვეთ თავისუფლება!
მოუწესრიგებელი ინფრასტრუქტურა, სუფთა და თბილი წყლის პრობლემა, სათამაშოების ნაკლებობა - ომბუდსმენის ოფისი საბავშვო ბაღების პრობლემებზე სპეციალურ ანგარიშს აქვეყნებს.
მონიტორინგი საქართველოს 143 საბავშვო ბაღში ჩატარდა და გაირკვა, რომ სკოლამდელი აღზრდის დაწესებულებებში სერიოზული პრობლემებია, მათ შორისაა ჰიგიენა და შშმ პირებისთვის შეუფერებელი გარემო:
- არასაკმარისი ფართის გამო, შეზღუდულია ბავშვების საჭიროებები. განსაკუთრებით, არასტანდარტულ შენობებში განთავსებულ საბავშვო ბაღებში;
- საბავშვო ბაღები არ არის სრულად მორგებული შშმ ბავშვების საჭიროებებზე და ვერ უზრუნველყოფს მათ სრულფასოვან ჩართულობას;
- საბავშვო ბაღების აბსოლუტურ უმრავლესობაში ეზო არ არის მოწყობილი აღსაზრდელთა საჭიროებებისა და უსაფრთხოების შესაბამისად;
- არასაკმარისია ინვენტარი, რაც განსაკუთრებით მწვავეა საძინებლების, სააღმზრდელო და სასადილო ოთახების საჭიროებებთან მიმართებით;
- საბავშვო ბაღები იშვიათად მარაგდება აღსაზრდელთა ასაკისა და რაოდენობის შესაბამისი სათამაშოებით;
- სველი წერტილები არ არის მოწყობილი ბავშვთა და განსაკუთრებით, შშმ ბავშვთა საჭიროებების მიხედვით; ფართობი და ინვენტარი არ შეესაბამება აღსაზრდელთა რაოდენობას. ამასთან, საბავშვო ბაღების ნაწილში სველი წერტილები არ არის უზრუნველყოფილი თბილი წყლით;
- აღმზრდელთა უმეტესობას არ აქვს გავლილი გადამზადება ბავშვთა მიმართ ძალადობის საკითხებზე; ეს ხელს უშლის ძალადობის შემთხვევათა გამოვლენასა და მათზე დროულ რეაგირებას;
- შემოწმებული საბავშვო ბაღების 34%-ში ირიცხებიან შშმ აღსაზრდელები, თუმცა მათგან მხოლოდ 14.2% ჰყავს სპეციალური პედაგოგის კადრი;
- პრობლემურია გეოგრაფიული ხელმისაწვდომობის საკითხიც; სოფლების მხოლოდ 13,75%-დან ხდება აღსაზრდელების ტრანსპორტირება ახლომდებარე საბავშვო ბაღში.
სახალხო დამცველი იმედს გამოთქვამს, რომ საბავშვო ბაღებში გამოვლენილ პრობლემებს სათანადო ყურადღება მიექცევა.
