ტექნიკური უნივერსიტეტის პროფესორის, ოთარ გელაშვილის მკვლელობაში ბრალდებულებს 20-20 წლიანი პატიმრობა მიუსაჯეს

რუსთავის საქალაქო სასამართლომ სრულად გაიზიარა პროკურატურის მიერ წარდგენილი მტკიცებულებები და გარდაბნის მუნიციპალიტეტში დამამძიმებელ გარემოებებში ჩადენილი განზრახ მკვლელობის ფაქტზე ბრალდებულ ორ პირს 20-20 წლით თავისუფლების აღკვეთა შეუფარდა - ინფორმაციას პროკურატურა ავრცელებს:

სასამართლო პროცესზე გამოკვლეული მტკიცებულებებით დადასტურდა, რომ  2023 წლის აგვისტოში, გარდაბნის მუნიციპალიტეტის სოფელ ყარათაკლიაში, ბრალდებულებმა, შურისძიების მოტივით, დაზარალებულს ჯგუფურად, განსაკუთრებული სისასტიკით სიცოცხლისთვის სახიფათო, მრავლობითი დაზიანებები მიაყენეს. მიღებული დაზიანებების შედეგად დაზარალებული გარდაიცვალა.

პროკურატურამ ორივე პირს ბრალდება საქართველოს სისხლის სამართლის კოდექსის 109-ე მუხლის „ი“ და „მ“ ქვეპუნქტებით (განზრახ მკვლელობა ჩადენილი ჯგუფურად, განსაკუთრებული სისასტიკით) წარუდგინა. სასამართლომ ორივე მათგანი სრულად ცნო  დამნაშავედ წარდგენილ ბრალდებაში." აცხადებს საგამოძიებო უწყება.

ცნობისთვის, საუბარია ტექნიკური უნივერსიტეტის ლექტორის, ოთარ გელაშვილის გატაცებისა და წამებით მკვლელობის საქმეზე. ის ნაწამები გარდაბნის ტყეში მწყემსმა იპოვა. დაახლოებით 1 თვის განმავლობაში გელაშვილი უგონო მდგომარეობით საავადმყოფოში იმყოფებოდა, სადაც მისი გადარჩენა ვერ მოხერხდა.