წელიწადნახევრის წინ, მთვრალ რუსებთან მოუვიდა კონფლიქტი, რომლებიც ამბობდნენ, რომ საქართველო რუსეთის ნაწილია | ოკმელაშვილის ნათესავი შსს-ს განცხადებაზე
გამოქვეყნდა:
სარეკლამო კომპანია "ლიმონის" ოფისიდან სამართალდამცველებმა ტექნიკა წაიღეს. პარალელურად, უკვე სამი საათია ჩხრეკა გრძელდება კომპანიის დამფუძნებლის, გიორგი ოკმელაშვილის საცხოვრებელ სახლში. თავად ოკმელაშვილი კი შსს-მ აქციებში მონაწილეობისთვის დააკავა და პოლიციაზე თავდასხმას ედავება.
როგორც მისი ცოლის ძმა, "დღის სტუმრის" ეთერში ამბობს, მომხდარი სავარაუდოდ სწორედ მათი ოჯახის აქტიურ მონაწილეობას უკავშირდება რუსული კანონის საწინააღმდეგო აქციებში. მისივე თქმით, შსს-ს განცხადება, რომ ოკმელაშვილი "სხვადასხვა დანაშაულისთვისაა" ნასამართლევი, ტყუილია და ოკმელაშვილი დაახლოებით წელიწადნახევრის წინ, ერთ -ერთ ბარში მომხდარი ინციდენტის დროს დააკავეს:
"თითქოს მრავალგზის ნასამართლევი გიორგი ოკმელაშვილი დააკავეს - ეს იყო წელიწადნახევრის წინ, როდესაც მთვრალი რუსი ახალგაზრდები ერთ- ერთ ბარში არ იქცეოდნენ წესიერად და საუბრობდნენ რომ საქართველო რუსეთის ნაწილია, მათთან მოუვიდა კონფლიქტი, რის შედეგადაც მოხდა ფიზიკური დაპირისპირება. ესა გიორგის ნასამართლეობაზე რაც შემიძლია გითხრათ" ამბობს ოკმელაშვილის ახლობელი გიორგი ჩხეიძე.
