გორში ბიზნესმენ სოსო ბაბაევის დაკავებას აპროტესტებენ და აქციისთვის ემზადებიან
გამოქვეყნდა:
გორში საპროტესტო აქციისთვის ემზადებიან - ანტისაოკუპაციო რესტო ბარში იკრიბებიან აქტივისტები და ოპოზიციის წარმომადგენლები, ისინი ვინც სოსო ბაბაევის დაკავებას აპროტესტებენ. სამოქალაქო აქტივისტები და ოპოზიციონერები დარწმუნებული არიან, რომ ბაბაევი ისჯება ხელისუფლების მიმართ კრიტიკული დამოკიდებულების გამო, პროევროპულ აქციებში მონაწილეობისა და იმის გამოც, რომ ის დროდადრო უკრაინაში ჰუმანიტარულ ტვირთს აგზავნის.
სოსო ბაბაევი რეგიონში ერთადერთი ბიზნესმენია, რომელიც საკუთარ მოსაზრებას ხმამაღლა აფიქსირებს და ხელისუფლებას აკრიტიკებს.
გორში ბიზნესმენი და სამოქალაქო აქტივისტი, იოსებ ბაბაევი გასულ ღამეს დააკავეს. ადვოკატის ინფორმაციით, მას იარაღის უკანონო შეძენა-შენახვა ედავებიან ედავებიან. თუმცა უფლებადამცველისა და მეგობრების ინფორმაციით, რუსული წარმოების "მაკაროვი" მანქანაში მას სწორედ პოლიციელებმა ჩაუდეს. ადვოკატის თქმითვე ბაბაევი ნაცემია.
ბაბაევისთვის ბრალი ოფიციალურად ჯერ არ წარუდგენიათ. ამის შემდეგ კი გორის რაიონულ სასამართლოში აღკვეთის შეფარდებაზე სასამართლო სხდომა ჩაინიშნება. თუმცა, იქამდე, 17 საათზე გორის პოლიციასთან ბაბაევის მხარდამჭერების აქცია გაიმართება.
