მეტროსადგურ „ვარკეთილის“ რეაბილიტაციის დასასრულებლად ხელშეკრულება ბელარუსულ კომპანიასთან გაფორმდა | რა არის ცნობილი კომპანიის შესახებ

მეტროსადგურ „ვარკეთილის“ სარეაბილიტაციო სამუშაოების დასასრულებლად ხელშეკრულება ბელარუსულ კომპანიასთან გაფორმდა. ამის შესახებ დღეს თბილისის მერმა კახა კალაძემ დედაქალაქის მთავრობის სხდომაზე ისაუბრა.

 „განახლებული პროექტის ექსპერტიზის ეტაპზე, ლევან სამხარაულის სახელობის ექსპერტიზის ეროვნულმა ბიურომ მოითხოვა რკინაბეტონის კონსტრუქციების სიღრმისეული შესწავლა, რაც ადგილობრივი საექსპერტო ორგანიზაციების რესურსებით საკმაოდ რთული აღმოჩნდა. ამიტომ, მოგვიწია უცხოელი ექსპერტების ჩართულობა, ვისაც ასეთი ტიპის მეტროსადგურებზე უმუშავია. როგორც იცით, თბილისის მეტრო საბჭოთა პერიოდშია აშენებული. ამიტომ, მეტროსადგურ „ვარკეთილის“ სარეაბილიტაციო სამუშაოების მოკლე ვადაში დასასრულებლად უკვე გაფორმდა ხელშეკრულება ბელარუსულ კომპანიასთან, შპს „პრობილდ ექსპერტთან“ და მიმდინარეობს რკინაბეტონის კონსტრუქციების სრული კვლევა, ასევე, აღდგენის პროექტის მომზადება“, - განაცხადა კახა კალაძემ.

გარდა ამისა, მერის ინფორმაციით, პროექტის ფარგლებში, სამშენებლო კომპანია „ბადაქონსთრაქშენმა“ უკვე განახორციელა ძველი ჭერის სრული დემონტაჟი, ბაქნის ქვეშ შიდა სამეურნეო სივრცეების სადემონტაჟო და სარემონტო სამუშაოები, შეკვეთილია ახალი ჭერის კონსტრუქციის მოსაწყობად საჭირო მასალა და სხვა.

კახა კალაძის თქმით, ზემოთ აღნიშნულის გათვალისწინებით, მეტროსადგურ „ვარკეთილის“ რეაბილიტაციის პროექტის დასრულება მიმდინარე წლის სექტემბერშია დაგეგმილი.

LinkedIn -ის მიხედვით შპს „პრობილდ ექსპერტს“ ოფისი თბილისშიც აქვს, კომპანია თბილისის მერიის მეზობლად გიორგი სააკაძის II ჩიხი, 1ა -ში მდებარეობს. აღნიშნულია, რომ ProBuild Expert-ს აქვს 8 წელზე მეტი გამოცდილება საექსპერტო სამუშაოების შესრულებაში საქართველოსა და ბელარუსში. კომპანიასთან ასოცირებული პირები არიან ივან სავჩენკო ტექნიკური დირექტორი და ევგენი ბობრუკი სამშენებლო ექსპერტი. კომპანიასთან ასოცირებული პირები არიან ივან სავჩენკო ტექნიკური დირექტორი და ევგენი ბობრუკი სამშენებლო ექსპერტი.