"ბიუ ბიუ": ჩვენს პროდუქტში ანტიბიოტიკი არ ფიქსირდება, დაუშვებელია ქათმის ნაკელი გამოყენებული იყოს ადამიანების ან ცხოველების საკვებად

რძის სკანდალის ფონზე განცხადებას ავრცელებს კომპანია „ბიუ ბიუ“. კომპანია სურსათის ეროვნული სააგენტოს წერილს აქვეყნებს, რომლის მიხედვითაც 2018-19 წლებში, როცა „ყვარლის ბაგა“ „ჩირინას” ნაკელს ყიდულობდა, ფერმის ქათმები სურსათის ეროვნულმა სააგენტომ 5-ჯერ შეამოწმა და მათში ანტიბიოტიკი „ტეტრაციკლინი“ არ აღმოუჩენია. ამასთან კომპანია განცხადებაში ხაზს უსვამს იმას, რომ ქათმის ნაკელის გამოყენება ცხოველების საკვებად  დაუშვებელია.

საზოგადოების დიდი ინტერესიდან გამომდინარე, გვინდა ნათელი მოვფინოთ რამდენიმე ძალიან მნიშვნელოვან საკითხს, რომელიც ყველას გვაღელვებს. ჩვენი ვალია, მკაფიოდ და ფაქტებზე დაყრდნობით გავცეთ პასუხი გაჩენილ კითხვებს.

2013 წლიდან, წარმოების პირველი დღიდან, ჩვენი ქათამი თავისუფალია ყველა სახის ჰორმონული დანამატისა და სტეროიდისგან. მეტიც, საქართველოში არც ერთი მეფრინველეობა არ იყენებს ჰორმონებს. ამას საქართველოს კანონდებლობაც ითვალისწინებს.

რაც შეეხება ანტიბიოტიკებს, პროდუქცია პერიოდულად მოწმდება ანტიბიოტიკების კვალზე სეს-ის მიერ და სრულიად სუფთაა. ჩვენს პროდუქტში ანტიბიოტიკი “ტეტრაციკლინი” არ ფიქსირდება, რის დამადასტურებელ საბუთს აქვე გაწვდით.

რაც შეეხება ქათმის ნაკელს - მისგან მზადდება კომპოსტი, რომელიც გამოიყენება ნიადაგის გასაჯანსაღებლად,  მ ც ე ნ ა რ ე ე ბ ი ს თ ვ ი ს ! დაუშვებელია ქათმის ნაკელი გამოყენებული იყოს ადამიანების ან ცხოველების საკვებად.“ - აღნიშნულია განცხადებაში.

„რადიო თავისუფლების” ჟურნალისტური გამოძიებით დადგინდა, რომ რძის მწარმოებელი კომპანია „ყვარლის ბაგა” ძროხებს ქათმის სკინტლით კვებავდა. „ყვარლის ბაგის“ რძეს ყიდულობენ „სანტე“, „სოფლის ნობათი“, „აგროჰაბი“ და „ყვარლის ბაგის“ შვილობილი „რძის ლაბორატორია“. ამის შესახებ ცნობილი გახდა სასამართლო დავით, რომელიც ლაშა პაპაშვილის „ყვარლის ბაგამ“ რევაზ ვაშაკიძის „ჩირინას“ („ბიუ-ბიუს“) წინააღმდეგ აწარმოა და მოიგო. „ყვარლის ბაგამ“ „ჩირინას” სასამართლოში უჩივლა, ამტკიცებდა რომ ფერმის რძეში ანტიბიოტიკები „ჩირინას” ნაკელიდან მოხვდა.