საქართველოს მოსახლეობა „კოვიდ 19“-ის შესახებ სათანადოდ ინფორმირებული არაა - „ნეოლაბის“ კვლევა

ახალ კორონავირუსთან დაკავშირებით მოქალაქეების ინფორმირებულობის კვლევა კლინიკა „ნეოლაბის“ დაკვეთით კომპანია „დიარ.ჯიმ“ 2-4 მარტის პერიოდში ჩაატარა. საიდანაც გამოიკვეთა, რომ საქართველოს მოსახლეობა „კოვიდ 19“-ის შესახებ სათანადოდ ინფორმირებული არაა.

5200 მოქალაქე ელექტრონულად გამოიკითხა. თავად კვლევის ავტორები ამბობენ, რომ ჩართულობა იყო უპრეცედენტო. ამასთან ერთად, საინტერესოა, რომ 5200 ადამიანიდან 11% იყო ჯანდაცვის სფეროში დასაქმებული პირები.

კვლევამ აჩვენა, რომ გამოკითხულთა მეოთხედს გრიპი და კორონავირუსი ერთი და იგივე ჰგონია, 63 % კი აქვს ინფორმაცია, რომ „კოვიდ 19“ სულ სხვა ტიპის ვირუსული ინფექციაა.

ინფექციის გამოკითხულთა 43 % ეშინია, 46-ს კი კითხვაზე ეშინიათ თუ არა კორონა ვირუსის პასუხი აქვთ რომ - არა. ასევე გამოკითხულთა 16% მიიჩნევს, რომ კორონა ვირუსის საწინააღმდეგო მედიკამენტი არსებობს, თუმცა ის საქართველოში ჯერ არ არის შემოსული.

კითხვაზე, მიაკითხავდით თუ არა სამედიცინო დაწესებულებას კორონავირუსზე ეჭვის შემთხვევაში?

გამოკითხულთა, უმრავლესობა, 95% ამბობს, რომ მიაკითხავდა, თუმცა თითქმის 5% უარყოფით პასუხს სცემს.

მთავარი კითხვა - მზადაა თუ არა კორონავირუსის ეპიდემიასთან საბრძოლველად ქვეყანა?

გამოკითხულთა 19 პროცენტს მიაჩნია, რომ ქვეყანა ეპიდემიასთან საბრძოლველად მზადაა, ხოლო 55% ფიქრობს, რომ არ არის მზად.

საგულისხმოა ის ფაქტი, რომ კვლევიდან გამოიკვეთა ასეთი შედეგი - ჯანდაცვის სფეროს მუშაკების ცოდნა „კოვიდ 19“-ზე სხვა სფეროში დასაქმებულების იდენტურია.