თვითიზოლაციის რეკომენდაციებს პაციენტები არღვევენ, მათ შორის, ექიმებიც - მთავრობა ზომებს ამკაცრებს
გამოქვეყნდა:
იტალიიდან ჩამოსული ექიმები კარანტინში გადაიყვანეს, რასაც მათი პროტესტი მოჰყვა. კარანტინიდან ერთი ექიმი თვითიზოლაციაში დააბრუნეს. ამის შემდეგ კი ექიმებმა დაარღვიეს თვითიზოლაციის რეკომენდაცია და სამსახურში გამოცხადდნენ.
გლდანში მდებარე კლინიკა “მედ კაპიტალში” დღეს პაციენტების ნაწილი არ მივიდა. შეიტყვეს, რომ სამმა ექიმმა თვითიზოლაციის პირობები დაარღვია და სამსახურში მივიდა. ერთ-ერთი პაციენტის მტკიცებით, ექიმებს მარიამ სესიაშვილს, ეკა ზაქაშვილს და თეა მარტიაშვილს ეპიდემიოლოგმა გუშინ რეკომენდაცია მისცა, რომ თვით იზოლაციაში ყოფილიყვნენ და პაციენტებთან კონტაქტი არ ჰქონოდათ, თუმცა ამის მიუხედავად, ეს მოთხოვნა არ გაითვალისწინეს.
სამი ექიმი, რომელმაც პაციენტების მტკიცებით, თვითიზოლაციის პირობები დაარღვიეს, საქართველოში ეგვიპტიდან დაბრუნდნენ. ეგვიპტეში „კოვიდ 19“-ის დიაგნოზით უკვე 67 ადამიანია ინფიცირებული. ამის მიუხედავად, „მედ კაპიტალში“ დირექციამ ექიმებს პაციენტებთან მუშაობის უფლება მისცა.
საჩხერეში, კარანტინში გადაიყვანეს ქართველი ექიმების ჯგუფი, რომლებიც თბილისში რომიდან დაბრუნდნენ, 14 დღით იზოლირებულ ზონაში მოათავსეს, რასაც ექიმების პროტესტო მოჰყვა. ნევროლოგი ჯამბულ მაკარიძე ამბობს, რომ თავდაპირველად თვითიზოლაციაზე შეუთანხმდნენ, თუმცა მოულოდნელად საპატრულო პოლიციის ესკორტით საჩხერეში გადაიყვანეს, რა დროსაც ავტობუსში სავარაუდო ინფიცირებულთან ერთად მოათავსეს.
ექიმების ჯგუფი იტალიაში დასასვენებლად 1 მარტს წავიდა. „მთავარი არხი“ დაინტერესდა, რატომ გაემგზავრნენ საშიშ ზონაში, რისკის მიუხედავად.
დღეს ცნობილი ხდება, რომ კარანტინში მოთავსებული ექიმების 13-კაციანი ჯგუფიდან ერთი, ცნობილი დერმატო ვენეროლოგი სოსო კობახიძე, საჩხერის საკარანტინო ზონიდან თვითიზოლაციაში გაუშვეს.
თვითიზოლაციის წესების დარღვევა, რომ პრობლემად იქცა, ეს დღეს პრემიერმაც დაადასტურა. მთავრობის სხდომაზე პრემიერმა საპატრულო პოლიციას დაავალა, აკონტროლოს ადამიანები, ვინც იზოლირებული უნდა იყოს, თუმცა წესებს არღვევს.
საქართველოში უკვე დაფიქსირდა ფაქტები, როდესაც, თვითიზოლაციიდან წამოსული ადამიანები უკან საპატრულო პოლიციამ დააბრუნა, თუ პირი თვითიზოლაციის წესებს არღვევს მას იძლებით საკარანტინო ზონებში გადაიყვანენ.
