საჯარო სივრცეში მუქარის გამო გომელაურის უწყებას მიმართავს "მთავარი არხის" ჟურნალისტი თათია წოწონავა. საქმე ეხება 10 ივლისს სოციალურ ქსელ TikTok-ში გავრცელებულ მასალას, რომელიც ჟურნალისტის პირდაპირ ეთერში ჩართვას ასახავს, კადრები მუქარის შემცველი ტექსტით არის დასათაურებული. ასეთივე გზავნილებია კომენტარებშიც.
"სოციალურ ქსელ TikTok-ში ძალიან აქტიურად მემუქრებიან, ალტ ინფოს წარმომადგენლები, ერთმა ადამიანმა დადო ჩემი ჩართვა და მუქარის შემცველ განცხადებებს ვხედავთ ამ ვიდეოში, კომენტარებში კიდევ უფრო უარესი ხდება. ამიტომ, ვინაიდან 5 ივლისის მოვლენების შემდეგ დაცულად არავინ არ ვგრძნობთ თავს, მე ვაპირებ პოლიციას შევატყობინო ამ მუქარის ფაქტზე", - ამბობს თათია წოწონავა.
მისივე თქმით, დაახლოებით ერთი კვირის წინ, მან ამ თემაზე შინაგან საქმეთა სამინისტრო სოციალურ ქსელშიც მონიშნა, თუმცა გამოხმაურება არ ყოფილა, დღეს კი აპირებს, რომ ოფიციალური განცხადება ჩააბაროს.
