ახალი ბანერები - კასპის და გორის გასაყართან ოკუპანტებმა არარსებული საზღვარი მონიშნეს
გამოქვეყნდა:
"ფრთხილად სახიფათო ადგილია"- გორისა და კასპის გასაყართან, არარსებული საზღვრის აღმნიშვნელი ახალი ბანერები გაჩნდა. ანტისაოკუპაციო მოძრაობის წევრებმა ბანერები რუსული წარწერებით, პატრულირების დროს აღმოაჩინეს.
ოკუპანტებმა ე.წ. საზღვრის აღმნიშვნელი ნიშნულები ცენტრალური მაგისტრალიდან დაახლოებით 1 კილომეტრის მოშორებით დადგეს. ანტისაოკუპაციო მოძრაობის წევრები არ გამორიცხავენ, რომ ტერიტორია დანაღმული იყოს.
"ვითხოვთ, რომ ეს ბანერი განიხილოს სასწრაფოდ IPRM-ის ფორმატში, რადგან შესაძლოა, ტერიტორია იყოს დანაღმული",- ამბობს დავით ქაცარავა, ანტისაოკუპაციო მოძრაობის წარმომადგენელი.
ადგილობრივები ამბობენ, რომ სოფლებში ცხოვრების ეშინიათ და მიმდებარე ტერიტორიაზე გადაადგილებისგანაც თავს იკავებენ.
სახელმწიფო უსაფრთხოების სამსახურში ადასტურებენ, რომ ცენტრალური მაგისტრალიდან 1 კილომეტრის დაშორებით ახალი ბანერი ნამდვილად განთავსებულია.
ავტორი: გიორგი ახალკაცი
