შეისწავლონ თანამდებობის პირების პასუხისმგებლობის საკითხი და გამოავლინონ ორგანიზატორები - 5-6 ივლისზე მედიაკოალიციის ანგარიში

კოალიცია მედიის ადვოკატირებისთვის 5-6 ივლისის მოვლენებთან დაკავშირებით ანგარიშს აქვეყნებს და აღმასრულებელ და საკანონმდებლო ორგანიზაციებს შესაბამისი რეკომენდაციებით მიმართავს.

ორგანიზაციის თქმით, ანგარიშში აღნიშნულია, ჟურნალისტებისა და ოპერატორების დაზიანების ფაქტები და ჟურნალისტურ საქმიანობაში უკანონო ხელშეშლის შემთხვევები, სახელმწიფოს წარმომადგენელთა მიერ მიღებული გადაწყვეტილებების ლეგიტიმურობა და მიზანშეწონილობა. ასევე, განხილულია 5 – 6 ივლისის მოვლენებთან დაკავშირებით დამნაშავე პირების გამოვლენის, დაკავებისა და სასამართლოებში საქმის წარმოების პრაქტიკა.

2021 წლის 5 ივლისს პრაიდის კვირეულის ფარგლებში დაანონსებული "ღირსების მარში" ვერ შედგა. 

11:00 საათზე რუსთაველზე ძალადობრივი ჯგუფები შეიკრიბნენ, რომლებმაც პარლამენტთან ოპოზიციის კარვები დაარბიეს და ათობით ჟურნალისტს ფიზიკურად გაუსწორდნენ.

საერთო ჯამში, რადიკალური ჯგუფების თავდასხმების შედეგად, 53 მედიის წარმომადგენელი დაშავდა. მათგან ერთ-ერთი, ტელეკომპანია პირველის ოპერატორი, ცემიდან 6 დღეში გარდაიცვალა.

ძალადობრივი შინაარსის მოწოდებები პრორუსული ტელეკომპანია ალტ-ინფოს ეთერიდან, ჯერ კიდევ რამდენიმე დღით ადრე ისმოდა. ტელევიზიის დამფუძნებლის პასუხისმგებლობის საკითხზე, 6 სექტემბერს სახალხო დამცველმაც ისაუბრა. მან პროკურატურას მიმართა, რომ ზურაბ მახარაძის მიმართ სისხლის სამართლებრივი დევნა დაიწყოს.

მიუხედავად ძალადობრივი მოწოდებებისა მარშის დღეს რუსთაველზე სამართალდამცველები მცირე რაოდენობით იყო მობილიზებული. ამასთან, აქციაზე ძალადობრივ ქმედებებს წინ პრემიერმინისტრის განცხადება უძღოდა. 

ორგანიზაცია შესაბამის უწყებებს რეკომენდაციებით მიმართავს:

საქართველოს პარლამენტი

• საქართველოს პარლამენტმა დაგეგმოს საპარლამენტო მოსმენა 5-6 ივლისის მოვლენებთან დაკავშირებით, რათა შეფასდეს მთავრობის მიერ მოქალაქეთა დაცვისათვის გადადგმული ნაბიჯები;
• საქართველოს პარლამენტის წევრებმა შეწყიტონ აგრესიული რიტორიკა და სიძულვილის წახალისება მედიის წარმომადგენლების მიმართ და მკაფიოდ, არაორაზროვნად დაგმონ ძალადობრივი მოწოდებები თუ ქმედებები;
• საქართველოს პარლამენტის წევრებმა ღიად დაუჭირონ მხარი ჟურნალისტის პროფესიული საქმიანობის ხელშეუხებლობას.

საქართველოს მთავრობა

• საქართველოს მთავრობის წევრებმა შეწყიტონ აგრესიული რიტორიკა და სიძულვილის წახალისება მედიის წარმომადგენლების მიმართ;
• საქართველოს მთავრობამ შეწყვიტოს კრიტიკული მედიის მიმართ ბოიკოტი და უზრუნველყოს მედიასთან საქმიანი ურთიერთობის რეჟიმი;
• მაღალი თანამდებობის პირები საჯაროდ გაემიჯნონ ჟურნალისტების მიმართ ნებისმიერი სახის ძალადობას;
• საქართველოს მთავრობამ მიიღოს ზომები მედიის წარმომადგენლებისათვის კანონით გარანტირებული უსაფრთხო სამუშაო გარემოს შესაქმნელად

საქართველოს შინაგან საქმეთა სამინისტრო 

• დროულად ჩაატაროს ეფექტიანი და ობიექტური გამოძიება მედიის წარმომადგენლების დაზიანების ფაქტებზე და უზრუნველყოს დანაშაულის ორგანიზატორთა და შემსრულებელ პირთა გამოვლენა;
• მაღალი საზოგადოებრივი ინტერესის გათვალისწინებით, საზოგადოებას პერიოდულად მიაწოდოს ინფორმაცია გამოძიების მიმდინარეობის შესახებ;
• 5 ივლისის მასშტაბური ძალადობის გათვალისწინებით, სამართალდამცავი უწყებისათვის შექმნას სპეციალური ინსტრუქცია მედიის უსაფრთხოების დაცვის შესახებ.

საქართველოს გენერალური პროკურატურა

• დროულად ჩაატაროს ეფექტიანი და ობიექტური გამოძიება მედიის წარმომადგენლების დაზიანების ფაქტებზე. პროკურატურამ უზრუნველყოს დანაშაულის ორგანიზატორთა გამოვლენა. მათ შორის, ძალადობრივი ქმედებებისაკენ საჯაროდ მოწოდების ფაქტებთან დაკავშირებით;
• ჩაატაროს შინაგან საქმეთა სამინისტროს მიერ ძალადობის აღმკვეთი ღონისძიებების დაგეგმვისა და განხორციელების პროცესის გამოძიება, და შეისწავლოს ხელმძღვანელი თანამდებობის პირების, მათ შორის, შინაგან საქმეთა მინისტრ ვახტანგ გომელაურის პასუხისმგებლობის საკითხი;
• მაღალი საზოგადოებრივი ინტერესის გათვალისწინებით, საზოგადოებას პერიოდულად მიაწოდოს ინფორმაცია გამოძიების მიმდინარეობისა და ჩატარებული საგამოძიებო მოქმედებების შესახებ. 

"მედიაზე ძალადობის შეჩერებისა და პრევენციის მიზნით, აუცილებელია სასამართლომ საქმეთა განხილვა წარმართოს დროულად, ეროვნული კანონმდებლობისა და საერთაშორისო სტანდარტების სრული დაცვით, შეისწავლოს თავდამსხმელების მოტივაცია და თითოეულ საქმეზე მიღებულ გადაწყვეტილებაში განმარტოს, როგორ ხდება სამართლებრივ სახელმწიფოში მედიის უსაფრთხოების დაცვა.

ასევე, მნიშვნელოვანი იქნება საქართველოში აკრედიტებულმა დიპლომატიურმა კორპუსმა გააგრძელოს 5 და 6 ივლისის ძალადობრივი ფაქტების გამოძიების პროცესზე დაკვირვება და ინტენსიური კომუნიკაცია საქართველოს ხელისუფლებასთან მედიაგარემოს გაუმჯობესებისა და ჟურნალისტებისათვის უსაფრთხო სამუშაო გარემოს შექმნის მიზნით". - აცხადებს მედიაკოალიცია.