"სამინისტროს მხრიდან მზადყოფნაზე საუბარი უპასუხისმგებლობაა" - მძიმე ეპიდვითარების მიუხედავად, სკოლებში სწავლა განახლდა

მძიმე ეპიდემიოლოგიური ვითარების მიუხედავად, მთავრობის გადაწყვეტილებით, თბილისსა და რეგიონებში სასწავლო პროცესი განახლდა. მოსწავლეები საკლასო ოთახებს დღეიდან უბრუნდებიან.

განათლების სამინისტრო ირწმუნება, რომ რისკები გააანალიზეს და მზად არიან სწავლა ჩვეულ რეჟიმში გააგრძელონ.

საპირისპიროს ამტკიცებენ სფეროს ექსპერტები. ისინი ამბობენ, რომ კორონავირუსის ახალ შტამს სკოლები მოუმზადებელი ხვდება და მოსალოდნელ შედეგზე პასუხისმგებლობას მთავრობას აკისრებენ.

"განათლებისა და მეცნიერების სამინისტროს მხრიდან განცხადება იმის შესახებ, რომ სკოლებში სრული მზაობაა ბავშვების მისაღებად, მინიმუმ უპასუხისმგებლობაა, რასაც შესაძლოა, სამწუხაროდ მოჰყვეს გართულებული შედეგები. რეალურად სკოლა დღეს არის შეიარაღებული მხოლოდ საპირფარეშოების დასამუშავებელი ხსნარით და თერმომეტრით, მოგეხსენებათ, ამ შტამის პირობებში იყო შემთხვევები, როდესაც ტესტითაც კი არ მოხდა გამოვლენა ახალი შტამის. ნულზეა ამ შემთხვევაში კრიზისმენეჯმენტი და ნულზეა მზაობა განათლებისა და მეცნიერების სამინისტროს მხრიდან", - ამბობს ექსპერტი განათლების საკითხებში, ნინო კვიტაიშვილი.

ცნობისთვის, ქვეყანა უმძიმესი მეექვსე ტალღის მოლოდინშია. ეპიდვითარება რთულდება, ინფიცირებულთა რაოდენობა კი ყოველდღიურად იზრდება. სპეციალისტები ამბობენ, რომ სკოლებში სასწავლო პროცესის განახლებით ვითარება კიდევ უფრო დამძიმდება.