"მდგომარეობა სტაბილურია. საჭიროების შემთხვევაში მიეწოდება შესაბამისი მკურნალობა დაწესებულების ფარგლებს გარეთ საქართველოში" - პენიტენციური მიხეილ სააკაშვილზე
გამოქვეყნდა:
სპეციალური პენიტენციური სამსახური მიხეილ სააკაშვილთან დაკავშირებით მორიგ განცხადებას ავრცელებს.
უწყება ამტკიცებს, რომ მესამე პრეზიდენტს ჩაუტარდა სათანადო კვლევები, სამედიცინო შემოწმება და მისი მდგომარეობა "სტაბილურია".
მათივე თქმით, საჭიროების შემთხვევაში მიხეილ სააკაშვილს "მიეწოდება შესაბამისი მკურნალობა პენიტენციური დაწესებულების გარეთაც, საქართველოში".
"მსჯავრდებული მიხეილ სააკაშვილი იმყოფება სპეციალური პენიტენციური სამსახურის სამედიცინო დეპარტამენტის ექიმების 24 საათიანი სამედიცინო მეთვალყურეობის ქვეშ, ჩაუტარდა ლაბორატორიული კვლევები და სათანადო სამედიცინო შემოწმება შესაბამისი პროფილის ექიმების მიერ.
მისი ჯანმრთელობის მდგომარეობა არის სტაბილური.
სპეციალური პენიტენციური სამსახური მოქმედებს ნებისმიერი პატიმრის ჯანმრთელობის მდგომარეობის და უსაფრთხოების რისკების გათვალისწინებით. საჭიროების შემთხვევაში მსჯავრდებულ სააკაშვილს ჩაუტარდება ყველა აუცილებელი გამოკვლევა და მიეწოდება შესაბამისი მკურნალობა პენიტენციური დაწესებულების ფარგლებს გარეთაც საქართველოში.
მოვუწოდებთ პოლიტიკურად ანგაჟირებულ სუბიექტებს თავი შეიკავონ მიხეილ სააკაშვილის ჯანმრთელობის მდგომარეობით სპეკულირებისგან, რეალობისგან მკვეთრად განსხვავებული აღქმის შექმნისა და საზოგადოების შეცდომაში შეყვანის ყველა მცდელობისგან", - ნათქვამია განცხადებაში.
