"რესპუბლიკურის დემონტაჟი მოხდება, რეაბილიტაცია თუ ა.შ, საბოლოო გადაწყვეტილებას დოკუმენტების წარმოდგენის შემდეგ მივიღებთ" | აზარაშვილი

"რესპუბლიკურის დემონტაჟი მოხდება, რეაბილიტაცია თუ ა.შ, საბოლოო გადაწყვეტილებას დოკუმენტების წარმოდგენის შემდეგ მივიღებთ", - ამის შესახებ ჯანდაცვის მინისტრი ზურაბ აზარაშვილი საუბრობს. ამბობს, რომ რესპუბლიკურ საავადმყოფოსთან დაკავშირებით სხვადასხვა საკითხის დეტალურად განიხილვა მიმდინარე კვირაშია დაგეგმილი. 

"თვენახევრის წინ ვთქვი, რომ პირველადი შეფასებით, პირველადი დასკვნებით, აუცილებელი იქნებოდა შენობის ნაწილის დემონტაჟი და ახალი შენობის აშენება. როგორც მაშინაც აღვნიშნე, ვმუშაობდით კონცეფციაზე, შესათავაზებელ პირობებზე; ყველა დასაქმებული სამედიცინო პერსონალიდან აუცილებლად იქნებოდა უზრუნველყოფილი სამსახურით ან გაგრძელდებოდა სახელფასო ანაზღაურების გადახდა....

პარალელურად, რამდენიმე სხვადასხვა კომპანიაში მიმდინარეობს შეფასებითი სამუშაოები, როგორც ქვეყნის შიგნით, ასევე ქვეყნის გარეთ და ტექნიკური, ინფრასტრუქტურული თვალსაზრისით - რას ვიზამთ, დემონტაჟი მოხდება, რეაბილიტაცია თუ ასე შემდეგ, საბოლოო გადაწყვეტილებას ყველა დოკუმენტის წარმოდგენის შემდეგ მივიღებთ.

კლინიკა რომ უნდა იყოს სახელმწიფო კლინიკა, მაღალტქენოლოგიური და ყველა სტანდარტების შესაბამისი, რა სტანდარტებსაც ჩვენ 2025 წლიდან საქართველოში მოქმედ ყველა კლინიკას ვთხოვთ, ეს გადაწყვეტილება ნამდვილად მიღებულია და არ შეიცვლება. ახლა უკვე დეტალებია დასაზუსტებელი, როგორ მოხდება. სხვადასხვა ვადაში იქნება წარმოდგენილი დოკუმენტები. პარალელურად სწავლობს როგორც სამხარაულის ექსპერტიზის ბიურო, ასევე ევროპის საინვესტიციო ბანკის დაქირავებული კონსულტანტების ჯგუფი.

ბოლო ორი თუ სამი წლის განმავლობაშიც ევროპის საინვესტიციო ბანკი აქტიურად სწავლობდა აღნიშნულ კლინიკასთან დაკავშირებულ პრობლემებს და თავის შეთავაზებას ამზადებდნენ. რაღაც პერიოდის განმავლობაში შეჩერებული იყო, დღეს უკვე გაგრძელებულია პროცესი და საბოლოო დასკვნა გვექნება" - თქვა მან.

შეგახსენებთ, რომ დღეს რესპუბლიკურ საავადმყოფოში ექიმებსა და სამინისტროს წარმომადგენლებს შორის შეხვედრა შეთანხმების გარეშე დასრულდა.