"წამალი და სიცოცხლე გვინდა, ბატონო პრემიერო, მეტი არაფერი" | კანცელარიასთან მშობლების მარში დაიწყო

კანცელარიასთან აქონდროპლაზიის სინდრომის მქონე ბავშების მშობლების მარში დაიწყო. ისინი მსვლელობას პარლამენტამდე გამართავენ, შემდეგ კი კვლავ კანცელარიასთან დაბრუნდებიან, სადაც პროტესტის ნიშნად ღამეს გაათევენ.

მშობლების მოთხოვნა უცვლელია, ისინი შვილებისთვის საჭირო წამლის შემოტანასა და დაფინანსებას ითხოვენ.

"არ გავჩერდებით, მარში გადაიქცევა უფრო დიდ მარშად. ჩვენი გაჩერება არ შეიძლება, ჩვენ ვართ დედები, ვინც ვითხოვთ შვილების კარგ მომავალს, ჯანმრთელობის უფლებას. ჩვენი ხმა უნდა გავაგონთ, წამალი გვინდა ბატონო პრემიერო, წამალი და სიცოცხლე გვინდა, მეტი არაფერი, ნუ წაგვართმევთ სიცოცხლეს", - თქვა ქეთი ბეგიაშვილმა.

შეგახსენებთ, უკვე წელიწადზე მეტია აქონდროპლაზიის მქონე ბავშვების დედები შვილებისთვის საჭირო წამლის შემოტანასა და დაფინანსებას ითხოვენ. ბოლო კვირების განმავლობაში მშობლები პრემიერმინისტრთან შეხვედრას უშედეგოდ ითხოვენ. ისინი რამდენიმე დღეა უკვე კანცელარიასთან ღამეებს ათევენ.

ჯანდაცვის სამინისტრო ამტკიცებს, რომ პრეპარატი ევროკავშირში დამტკიცებული არაა. მინისტრის მოადგილის, თამარ გაბუნიას თქმით, "ვოსორიტიდის" ქვეყანაში შემოტანის პროცედურებს მხოლოდ იმ შემთხვევაში დაიწყებენ, თუ მიმდინარე წლის სექტემბრის ბოლომდე, ევროკავშირის, თუნდაც, რამდენიმე ქვეყანაში დადასტურდება ამ მედიკამენტით პაციენტების უზრუნველყოფა.