აფხაზეთი მზადაა Astoria Grande მიიღოს და რუს ტურისტებს უმასპინძლოს - ოკუპირებული აფხაზეთის ე.წ. პრეზიდენტი

დროებით ოკუპირებული აფხაზეთის ე.წ. პრეზიდეტნი ასლან ბჟანია, ბათუმის პორტში გამართული აქციის შემდეგ, რუსულ ლაინერ Astoria Grande-ს და რუს ტურისტებს "თბილ დახვედრას" დაჰპირდა.

"რესპუბლიკა დაინტერესებულია ტურისტული სერვისების გაფართოებით და გეოგრაფიული შესაძლებლობების გათვალისწინებით, ზაფხულში საკრუიზო ლაინერების მომსახურება ყველაზე პერსპექტიულად ითვლება. თუ ღირსეულად მივიღეთ ლაინერი "კნიაზ ვლადიმირი", Astoria Grande-სთვისაც მოიძებნება ადგილი" - უთხრა კრემლის პროპაგანდისტულ მედიას ბჟანიამ.

31 ივლისს გამთენიისას ბათუმის პორტში რუსული ლაინერი შემოვიდა, რომელმაც ქვეყენაში რუსი ტურისტები შემოიყვანა. არსებული ინფორმაციით, გემზე იმყოფებოდნენ ომისა და პუტინის მხარდამჭერი არტისტებიც. მოქალაქეები გემის შემოსვლას პროტესტით დახვდნენ. აქცია 30 ივლისს ღამით დაიწყო და მთელი ღამის განმავლობაში გაგრძელდა. ადგილზე ვითარება რამდენჯერმე დაიძაბა. საერთო ჯამში აქციაზე 23 პირი წვრილმანი ხულიგნობისა და პოლიციისადმი დაუმორჩილებლობის ბრალდებით დააკავეს. მათი ნაწილი უკვე გათავისუფლებულია.

ლაინერმა ბათუმის პორტი პროტესტის ფონზე, დაგეგმილზე ორი საათით ადრე 20:00 საათზე დატოვა. გარდა ამისა, საკრუიზო ლაინერმა Astoria Grande-მ შემდეგი რეისების მარშრუტიდან ბათუმი ამოიღო. მანამდე ცნობილი იყო, რომ ლაინერი ბათუმის პორტში ყოველ ორ კვირაში ერთხელ უნდა შემოსულიყო, თუმცა რეისების შესახებ საიტზე ინფორმაცია აღარ იგეგმება.