"ვერ დავუბრუნდებით სწავლას, მაშინ, როცა სხვა სტუდენტები ციხეში სხედან! უკან არ დავიხევთ! ძალა სტუდენტების ერთობაშია!" | თეატრალურის სტუდენტების განცხადება
გამოქვეყნდა:
თეატრალური უნივერსიტეტის სტუდენტები ქვეყანაში მიმდინარე მოვლენებთან დაკავშირებით განცხადებას ავრცელებენ და აცხადებენ, რომ დანებებას არ აპირებენ და ბრძოლა გრძელდება.
ისინი თსუ-ის სტუდენტების განცხადებასაც ეხმაურებიან და ამბობენ, რომ მათ საერთო მოთხოვნები: ხელახალი არჩევნები და რეჟიმის პატიმრების გათავისუფლება, აქვთ.
"დღეს თსუ-ის სტუდენტებმა საკუთარი უნივერსიტეტი დაიკავეს და ამით გააძლიერეს სტუდენტური ერთობა. მათ კიდევ ერთხელ აჩვენეს, რომ სტუდენტები უკან არ დავიხევთ! ჩვენ ერთად ვდგავართ და არ ვაპირებთ დანებებას! ვერ დავუბრუნდებით სწავლას, მაშინ, როცა სხვა სტუდენტები ციხეში სხედან! გვაქვს ორი საერთო მოთხოვნა! დაინიშნოს ხელახალი არჩევნები და გათავისუფლდნენ რეჟიმის პატიმრები!
სისტემამ არაერთხელ აჩვენა რომ სტუდენტების წინააღმდეგობის ეშინია, არაერთხელ შეეცადა ჩვენ გაჩუმებას, მაგრამ ჩვენი ხმა უფრო და უფრო ძლიერდება! ძალა სტუდენტების ერთობაშია!", - წერია განცხადებაში, რომელიც სტუდენტებმა წაიკითხეს.
დღეს, თბილისის სახელმწიფო უნივერსიტეტის სტუდენტებმა განაცხადეს, რომ ბრძოლის ფორმას ცვლიან და პროტესტს უნივერსიტეტის შენობაში აგრძელებენ.
