"PACE-მ მოითხოვა ძალადობის შეწყვეტა პოლიციის მხრიდან, დღეს მარიონეტმა პრეზიდენტმა სანქცირებული, ძალადობაზე პასუხისმგებელი შსს-ს მაღალჩინოსნები, დააჯილდოვა" | ზურაბიშვილი
გამოქვეყნდა:
პრეზიდენტი სალომე ზურაბიშვილი ოლიგარქის პრეზიდენტის, მიხეილ ყაველაშვილის მიერ, შინაგან საქმეთა სამინისტროს მოძალადე, სანქცირებული მაღალჩინოსნების დაჯილდოებას ეხმაურება.
"გუშინ, PACE-მ მოითხოვა ძალადობის შეწყვეტა პოლიციის მხრიდან, დღეს კი მარიონეტმა პრეზიდენტმა შინაგან საქმეთა სამინისტროს სანქცირებული მაღალჩინოსნები, რომლებიც ძალადობასა და წამებაზე არიან პასუხისმგებელნი, მათ შორის ცნობილი ხარებაც, დააჯილდოვა", - წერს ზურაბიშვილი X-ზე.
შეგახსენებთ, რომ არალეგიტიმურმა პრეზიდენტმა, მიხეილ ყაველაშვილმა ოლიგარქის მოძალადე, სანქცირებული პოლიციის მაღალჩინოსნები "ღირსების ორდენით" დააჯილდოვა.
რაც შეეხება ევროსაბჭოს - PACE-მ რეზოლუცია მიიღო, რომლითაც ახალი საპარლამენტო არჩევნების ჩატარებაა მოთხოვნილი, ასევე, პოლიტპატიმრების გათავისუფლება.
ეს მოთხოვნები "ქართულმა ოცნებამ" აპრილამდე უნდა შეასრულოს, მანამდე კი "ოცნების" დელეგაციას შეზღუდული უფლებამოსილება ექნება, რაც იმას ნიშნავს, რომ "ქართულ ოცნებას" ეკრძალება:
- სხვადასხვა კომიტეტის წევრობის უფლება;
- არჩევნების დაკვირვების უფლება;
- მომხსენებლად ყოფნის უფლება;
- ასამბლეაში თანამდებობის დაკავების უფლება;
- ასამბლეის წარმომადგენლობის უფლება.
რა წერია მონიტორინგის კომიტეტის დასკვნაში
მოგვიანებით, ევროსაბჭოს მიერ რეზოლუციის მიღების შემდეგ "ქართულმა ოცნებამ" განაცხადა, რომ ევროსაბჭოს საპარლამენტო ასამბლეაში მუშაობას წყვეტს.
