"პროდუქტი, რომელსაც ვიღებთ, გადის დამატებით შემოწმებას ჩვენსავე ლაბორატორიაში" - "რძე, რომელსაც კომპანია იღებს, ხარისხის უმაღლესი ევროპული სტანდარტითაა შემოწმებული" | "აგროჰაბი" და "სანტე"
გამოქვეყნდა:
"რადიო თავისუფლების" ჟურნალისტურ გამოძიებასთან დაკავშირებით "აგროჰაბი" განცხადებას ავრცელებს, რომელშიც აცხადებს, რომ "აგროჰაბში" წარმოებული ნებისმიერი პროდუქტი ნატურალურ და ჯანსაღ ნედლეულზე მზადდება და სრულიად უსაფრთხო და უვნებელია ადამიანის ჯანმრთელობისთვის.
როგორც განცხადებაშია აღნიშნული, ნებისმიერი პროდუქტი, რომელსაც "აგროჰაბი" იღებს გადის რამდენიმესაფეხურიან შემოწმებას ლაბორატორიაში და თუ პროდუქტი რაიმე სახით არ აკმაყოფილებს ხარისხის მოთხოვნებს, ის გაყიდვაში არ გადის.
"საზოგადოების მაღალი ინტერესიდან გამომდინარე განვმარტავთ, რომ კომპანია აგროჰაბში ნებისმიერი ნედლეული თუ პროდუქტი, რომელსაც კომპანია იღებს სხვა მომწოდებლისგან გადის რამდენიმესაფეხურიან დამატებით შემოწმებას ჩვენსავე ლაბორატორიაში.
კონკრეტულად რძე, რომელსაც ვიღებთ რამდენიმე კომპანიისგან, გადის შემოწმების ფაზებს, ცისტერნაშივე მოწმდება ფიზიკო-ქიმიური და მიკრობიოლოგიური პარამეტრები, შემდეგ გადმოტანილი რძე გადის შემოწმებას სიმჟავესა და PH ბალანსზე, თერმომდგრადობაზე, სომატურ უჯრედებზე, ანტიბიოტიკებზე, მიკრობთა საერთო რაოდენობაზე. იყო შემთხვევა, როდესაც მომწოდებლის მხრიდან მიღებულმა რძემ ვერ დააკმაყოფილა აღნიშნული შემოწმების კრიტერიუმები და ასეთი პროდუქტი უკან იქნა გაბრუნებული. სრულიად გამორიცხულია ნედლეულმა გადმოკვეთოს აგროჰაბის წარმოების „საზღვარი“ და შემდეგ პროდუქტის სახით გავიდეს საწარმოდან, რომელიც რაიმე სახით არ აკმაყოფილებს ხარისხის მოთხოვნებს.
სრული პასუხისმგებლობით ვაცხადებთ, რომ აგროჰაბში წარმოებული ნებისმიერი პროდუქტი ნატურალურ და ჯანსაღ ნედლეულზე მზადდება და სრულიად უსაფრთხო და უვნებელია ადამიანის ჯანმრთელობისთვის, სწორედ ამიტომ გვენდობა მომხმარებელი გახსნის დღიდან და ეს არის ჩვენი კომპანიის მთავარი და უცვლელი ღირებულება", - ნათქვამია განცხადებაში.
"რადიო თავისუფლების" ჟურნალისტური გამოძიების ფარგლებში გავრცელებულ ინფორმაციას "სანტეც" ეხმაურება და აღნიშნავს, რომ ნებისმიერი ნედლეული - რძე, რომელსაც კომპანია იღებს, ხარისხის უმაღლესი ევროპული სტანდარტითაა შემოწმებული.
"თუ რძე ატარებს რაიმე ტიპის პოტენციურ რისკს ხარისხთან დაკავშირებით, არ მიიღება და არ ვიყენებთ წარმოებაში. "სანტეს" მაღალტექნოლოგიურად აღჭურვილი და პროფესიონალებით დაკომპლექტებული ლაბორატორია გვაძლევს საშუალებას, ნედლეულის ხარისხი შემოწმდეს მიღებამდე. შემდეგ კი ვაკონტროლოთ პროდუქციის ხარისხი მთელი საწარმოო ჯაჭვის განმავლობაში. სწორედ ხარისხის სტანდარტები და ლაბორატორია გვაძლევს საშუალებას, მკაცრად ვაკონტროლოთ და არ ჩავიბაროთ უხარისხო ნედლეული. ამისი მაგალითია ის, რომ სანტე იყო პირველი, რომელმაც 2018 წელს რამდენჯერმე აღმოაჩინა ხარისხობრივი შეუსაბამობა "ყვარლის ბაგის" მიერ მოწოდებულ რძეში და არ შეისყიდა მისგან რძე (ინფორმაცია დასტურდება სასამართლო დავაში წარმოდგენილ დოკუმენტაციაში).
"სანტეს" რძის პროდუქტები გადის რამდენიმეეტაპიან შემოწმებას, ვიდრე მომხმარებლამდე მივა. შემოწმება იწყება ნედლეულიდან. ფერმერების მიერ მოწოდებული რძე მიღებამდე ქარხნის ლაბორატორიაში მოწმდება მიკრობიოლოგიურად, ანტიბიოტიკებზე, რძის შემცველობაზე. ქსელში გაშვებამდე, მომხმარებელთან მიწოდებამდე, პროდუქტები კიდევ რამდენჯერმე მოწმდება ხარისხობრივად, როგორც საკუთარ, ისე გარე აკრედიტებულ ლაბორატორიაში (მიკრობიოლოგიურად, პათოგენებზე). შესაბამისად, ჩვენს საწარმოში წარმოებული ნებისმიერი რძის პროდუქტი არის გარანტირებულად უმაღლესი ხარისხის, ჯანსაღი და უსაფრთხო ჩვენი მომხმარებლისთვის...", - ნათქვამია განცხადებაში.
შეგახსენებთ, რომ გუშინ "რადიო თავისუფლებამ" ჟურნალისტური გამოძიება გამოაქვეყნა, რომლის თანახმადაც, ბიზნესმენ ლაშა პაპაშვილის ნედლი რძის მწარმოებელი უდიდესი ფერმა ყვარლის ბაგა ძროხებს ევროკავშირში აკრძალული ქათმის ნაკელით კვებავდა. ის რძით ამარაგებდა "სანტეს", "სოფლის ნობათს", "აგროჰაბს" და რძის ლაბორატორიას.
ცნობისთვის: საქართველოს მთავრობის დადგენილება ნაკელის საკვებად გამოყენების აკრძალვის შესახებ 2023 წელს ამოქმედდა, ევროკავშირში კი დაახლოებით 20 წლის წინ.
