ქუთაისის პარლამენტის უფუნქციო შენობის ფასადის განათებისთვის 8 მილიონის დახარჯვა იგეგმება

შესყიდვების სააგენტოს ვებგვერდზე გამოქვეყნებული ინფორმაციის თანახმად ქ. ქუთაისში ტექნოლოგიური ჰაბის (ყოფილი პარლამენტის C კორპუსი) ფასადის მედია განათების (3D Mapping) პროექტირებისთვის შპს აქტივების მართვისა და განვითარების კომპანიამ ტენდერი 1 აპრილს გამოაცხადა. წინადადებების მიღება 17-22 აპრილის პერიოდში მოხდება.  შესყიდვის სავარაუდო ღირებულება კი  7 967 000 ლარია.

როგორც ტექნიკურ დავალებაშია ნათქვამი, პროექტირება და მშენებლობა, მოსამზადებელი და სამობილიზაციო სამუშაოების ჩათვლით, არაუგვიანეს 2025 წლის 7 სექტემბრისა უნდა შესრულდეს.

შენობის სახურავის ზედაპირის 3D Mapping პროექციული მედია განათების მოწყობისას ზონების საპროექციო ნაწილით გამოსახულების შევსების ტექნოლოგიური შესაძლებლობა უნდა იყოს მინიმუმ 85%. იმ ადგილებში, სადაც 3D Mapping-ის პროექციული მედია განათება მიუწვდომელია, გამოსახულების მთლიანობა შენარჩუნებული უნდა იყოს ფერადი დინამიკური განათების მოწყობილობებით ულტრა ვიწრო ოპტიკით. განათების მოწყობილობები უნდა დამონტაჟდეს ისე, რომ არ შეიქმნას ე.წ. „ნათების ხმაური“,  რომელიც ამცირებს პროექტირებული კონტენტის ხარისხს. კონტენტი უნდა შეიქმნას ფასადის სხვადასხვა მხარეს შორის ურთიერთქმედების შესაძლებლობის გათვალისწინებით (მაგ., ობიექტს უნდა შეეძლოს ფასადის ერთი მხრიდან ჩასვლა და ზედაპირის მეორე მხრიდან ამოსვლა და ა.შ.).

კონტენტის სახით არანაკლებ 10 ვიდეო ანიმაციის მომზადება (დიზაინი და შინაარსი შემსყიდველთან შეთანხმებით). 4 ცალი სპეციალური, ღონისძიებებთან და დღესასწაულებთან დაკავშირებული კონტენტის შემუშავება და კონფიგურაცია (დიზაინი და შინაარსი შემსყიდველთან შეთანხმებით). ვებ აპლიკაცია უნდა იყოს მრავალმხრივი გადაწყვეტა რთული მულტიმედიური და განათების სისტემების მართვისთვის, რომელიც დაფუძნებული უნდა იყოს ევროპულ ღრუბლოვან პლატფორმაზე, რომელიც უზრუნველყოფს დისტანციურ წვდომას ნებისმიერი მოწყობილობიდან - სმარტფონიდან, ტაბლეტიდან, პერსონალური კომპიუტერიდან ან ლეპტოპიდან.

პროექტორებს, გვერდითა განათების მოწყობილობებს, გუმბათქვეშა განათებას, კვების ბლოკებს, გამანაწილებელ მოწყობილობებს უნდა ჰქონდეთ 3-4 წელი გარანტია. სამონტაჟო კონსტრუქციებს (სიმყარის და სტაბილიზაციის ნაწილში) კი 10 წელი.

პრეტენდენტს ან/და მის ქვე-კონტრაქტორს უნდა გააჩნდეს ანალოგიური ტიპის, ხასიათის, სირთულის და შინაარსის არანაკლებ 4 შესრულებული პროექტი, კერძოდ, უცვლელი ფასადის 3D Mapping პროექციული მედია განათება გამოსახულებით და ხმის სინქრონიზაციით. შესრულებული პროექტების ჯამური მოცულობა არ უნდა იყოს 700 კვადრატულ მეტრზე ნაკლები.

საკანონმდებლო ორგანო ქუთაისიდან თბილისში 2012 წლის ოქტომბერში გადავიდა და პარლამენტის შენობა ფაქტობრივად უფუნქციოდ დარჩა. 2018 წელს მთავრობა შენობის შინაგან საქმეთა სამინისტროსთვის გადაცემას აპირებდა, ხოლო 2019 წელს შენობის გაყიდვას ცდილობდა. 2024 წლის აგვისტოში მთავრობამ გამოსცა განკარგულება რომლის მიხედვითაც , ქუთაისის პარლამენტის შენობაში 2025 წელს ტექნოლოგიური ჰაბი გაიხსნება. ჰაბის გახსნა ეკონომიკისა და მდგრადი განვითარების სამინისტროს სისტემაში შემავალ სსიპ საქართველოს ინოვაციებისა და ტექნოლოგიების სააგენტოს დაევალა. 

 ტექნოლოგიური ჰაბის გახსნისთვის მთავრობა 2 მლნ ლარის დახარჯვას გეგმავს.

შპს აქტივების მართვისა და განვითარების კომპანიის 100%-იანი წილის მფლობელი სახელმწიფოა. დირქტორი კი ირაკლი მუკნიაშვილი.