სტრასბურგის სასამართლოს მორიგი გადაწყვეტილება მიხეილ სააკაშვილის საქმეზე | რა წერია დოკუმენტში

საქართველოს მესამე პრეზიდენტის, მიხეილ სააკაშვილის ადვოკატებმა ადამიანის უფლებათა ევროპული სასამართლოსგან მორიგი გადაწყვეტილება მიიღეს.

რა წერია სტრასბურგის სასამართლოს წერილში, "მთავარი არხის" ვებგვერდთან მიხეილ სააკაშვილის ადვოკატი თამთა მურადაშვილი საუბრობს:

მას შემდეგ, რაც 18 ნოემბერს, მიხეილ სააკაშვილმა გონება დაკარგა და მისი მდგომარეობა იყო კრიტიკული, მისმა ადვოკატებმა, საფანგეთის დროით სამუშაო დღის ბოლოს მივაწოდეთ სტრასბურგის სასამართლოს ინფორმაცია შექმნილი ვითარების შესახებ და ასევე გავუგზავნეთ სახალხო დამცველის ეგიდით შექმნილი სამედიცინო ექსპერტთა ჯგუფის 17 ნოემბერის დასკვნა. 19 ნოემბერსაც, დილით ადრე სასამართლოს მივაწოდეთ განახლებული ინფორმაცია მიხეილ სააკააშვილის მდგომარეობის შესახებ. მიუხედავად იმისა, რომ ის გონზე მოვიდა, მდგომარეობა კრიტიკული იყო და ის რჩებოდა ციხის საავადმყოფოში.

სასამართლოსგან 19 ნოემბერს, გვიან მივიღეთ ეს გადაწყვეტილება. ამ დროს, მიხეილ სააკაშვილს გორის სამხედრო ჰოსპიტალში გადაყვანაზე მთავრობის შეთავაზებაზე თანხმობა და შიმშილობის შეწყვეტის თაობაზე გადაწყვეტილება გაცხადებული ჰქონდა.

სტრასბურგის სასამართლომ მხედველობაში მიიღო მიხეილ სააკააშვილის დამძიმებული ჯანმრთელობის მდგომარეობა, სიტუაციის კრიტიკულობა და მიუთითა მას, რომ დაუყოვნებლივ შეეწყვიტა შიმშილობა. მთავრობას დაავალა, რომ ეხელმძღვანელა სახალხო დამცველის 17 ნოემბრის დასკვნით. როგორც იცით, ამ დასკვნაში წერია, რომ სასჯელაღსრულების მე-18 დაწესებულება არ შეესაბამებოდა შესაბამის სტანდარტებს და მიხეილ სააკაშვილს ესაჭიროებოდა სხვა, გამართულად ფუნქციონირებად, მულტიფუნქციურ, ინტენსიური თერაპიის დაწესებულებაში გადაყვანა.

სასამართლოს წერილში ასევე აღინიშნულია, რომ მათ, ჩვენი მოთხოვნა უკვე გადაგზავნილი ჰქონდათ მთავრობისთვის, - ამბობს თამთა მურადაშვილი.

იხილეთ ასევე:

• "სტრასბურგის სასამართლომ მოთხოვნა დროებითი ღონისძიების შესახებ დააკმაყოფილა" | ნიკა გვარამიას საგანგებო ბრიფინგი
• "მიხეილ სააკაშვილის მდგომარეობაზე, სტრასბურგს ინფორმაცია ყოველდღიურად უნდა მივაწოდოთ" | ნიკა გვარამია
• "მიხეილ სააკაშვილი ახლა კარგადაა... ვეკონტაქტე რეანიმაციაში... ბადრაგის გაყვანის დროს, მოწყვეტით დაეცა" | ნიკა გვარამიას განცხადება გლდანის ციხის დატოვების შემდეგ
• მიხეილ სააკაშვილი გორის სამხედრო ჰოსპიტალში გადაიყვანეს