ბორჯომში გაჩენილი ხანძრის კერების უმეტესობა, ამ მომენტისთვის, ლიკვიდირებულია - შსს
გამოქვეყნდა:
ბორჯომის მუნიციპალიტეტში გაჩენილი ხანძრის კერების უმეტესობა, ამ მომენტისთვის, ლიკვიდირებულია. ძლიერი ქარი და მაღალი ტემპერატურა, კვლავ ხელს უშლის ხანძრის ქრობის პროცესს - ნათქვამია შსს-ს მიერ გავრცელებულ განცხადებაში.
"დღეს დილიდან, ხანძრის სალიკვიდაციო ღონისძიებებში ჩართულია სასაზღვრო პოლიციის ვერტმფრენები და თურქეთის რესპუბლიკის სამი სპეციალიზებული სახანძრო თვითმფრინავი. რთულად მისადგომ რელიეფზე, რამდენიმე კილომეტრის მანძილზე გაიშალა სახანძრო მაგისტრალები, რისი საშუალებითაც ცეცხლის კერები მუშავდება.
ტარდება ყველა შესაბამისი ხანძარსაწინააღმდეგო საპრევენციო ღონისძიება, რათა ცეცხლი არ გავრცელდეს დასახლებულ პუნქტებსა თუ სტრატეგიულ ობიექტებზე. მიუხედავად რთული სალოკალიზაციო-სალიკვიდაციო სამუშაოებისა, ხანძრის ქრობაში მონაწილე უწყებების არც ერთი წარმომადგენელი არ დაშავებულა." აცხადებს შსს.
დღეს უკვე მეშვიდე დღეა ბორჯომის ხეობაში ხანძარს ებრძვიან. სამუშაოებში მეხანძრე მაშველების გარდა, ჩართულია პოლიცია და თავდაცვის ძალები. საგანგებო სამსახურის ბოლო ინფორმაციით, რთულად მისადგომ რელიეფზე გაიშალა სახანძრო მაგისტრალები, დამონტაჟდა დამატებითი წყალსაქაჩი ტუმბოები.
