გარდაბნის მუნიციპალიტეტის სოფელ ყარაჯალარში უკვე მეორე დღეა მკაცრი საკარანტინე წესები მოქმედებს. სოფლის ჩაკეტვის გადაწყვეტილება ხელისუფლებამ გუშინ, 24 ივლისს მიიღო. მიზეზი კორონავირუსის შემთხვევების რაოდენობის მატება გახდა.
ამ დროისათვის სოფლის შესასვლელ-გასასვლელებს პოლიცია აკონტროლებს. როგორც ქვემო ქართლის სახელმწიფო რწმუნებული ამბობს, აღებულია 377 ტესტი და პასუხები სავარაუდოდ დღის ბოლოს გახდება ცნობილი:
"გუშინ გარდაბნის მუნიციპალიტეტში ჩატარდა 705 კვლევა. 377 კვლევა ჩატარდა ყარაჯალარში... გუშინდელი შედეგების პასუხი ამ წუთამდე არ არის და დღის მანძილზე დაგიდასტურებთ შედეგებს. წინა დღეების კვლევიდან მხოლოდ ერთი ფაქტია დადსტურებული"- ამბობს შოთა რეხვიაშვილი.
ამ დროისათვის არსებული მონაცემებით, გარდაბნის მუნიციპალიტეტში სულ 44 ადამიანია ინფიცირებული, მათგან 23 ყარაჯალარში ცხოვრობს.
25 ივლისს საქართველოში კორონავირუსით ინფიცირების 13 ახალი შემთხვევა გამოვლინდა და 5 ადამიანი გამოჯანმრთელდა.
