ლევან იოსელიანი დღეს "რუსული კანონის" საწინააღმდეგო აქციების მონაწილე სტუდენტებს შეხვდება
გამოქვეყნდა:
ახალი სახალხო დამცველი, ლევან იოსელიანი დღეს იმ სტუდენტებს შეხვდება, რომლებიც 7-8 მარტის აქციებში მონაწილეობდნენ. შეხვედრის სურვილი თავდაპირველად ახალგაზრდებმა გამოთქვეს და იოსელიანს საჯაროდ მიმართეს.
სტუდენტები სახალხო დამცველს გააცნობენ მათ პოზიციას მიმდინარე მოვლენებთან დაკავშირებით, ასევე, მიაწოდებენ ინფორმაციას პოლიციისა და სპეცრაზმის მხრიდან საპროტესტო აქციებზე განხორციელებული ძალადობის შესახებ.
იოსელიანმა 15 მარტს განაცხადა, რომ მზად იყო შეხვედროდა ყველას, ვინც ფიქრობს, რომ აქციებზე დაირღვა მისი გამოხატვის უფლება, მოექცა სახელმწიფო მანქანის არაპროპორციული ძალის ქვეშ, ან ხელისუფლების მხრიდან გრძნობს რაიმე საფრთხეს, თავისი პოლიტიკური შეხედულების გამო.
ცნობისთვის, აქციების შემდეგ მმართველი გუნდის წარმომადგენლების მხრიდან სტუდენტებთან დაკავშირებით არაერთი განცხადება გაკეთდა:
- "რამდენიმეს ფოტო ვნახე... გაოგნებული დავრჩი, რაღაც სატანისტების ფორმები ეცვათ" | ღარიბაშვილი აქციის მონაწილეებზე;
- "ფრანკლინის კლუბი" უცხოური გავლენის აგენტია, სტუდენტების და მოსწავლეების რეკრუტირებას ახორციელებს - კობახიძე;
- ნაციონალი ლექტორები სტუდენტებს აქციებში მონაწილეობის სანაცვლოდ ნიშნების მომატებას სთავაზობდნენ - კობახიძე
