აზარაშვილის თქმით, აქონდროპლაზიის სამკურნალო წამალი "ექსპერიმენტულ" ეტაპზეა და მისი შეძენის რეკომენდაცია არ აქვთ
გამოქვეყნდა:
საქართველოს ჯანდაცვის მინისტრის, ზურაბ აზარაშვილის განცხადებით, აქონდროპლაზიის სამკურნალო მედიკამენტი "ვოზორიტიდი" გარკვეულ გვერდით მოვლენებთან არის დაკავშირებული და მისი დაფინანსების განხილვა შეჩერებული აქვთ ისეთ ქვეყნებს როგორებიც არის, გერმანია, ბრიტანეთი და სხვა.
მინისტრის თქმით, ამის მიზეზია ის, რომ პრეპარატი ექსპერიმენტულ ეტაპზეა და ახლა დანერგვის ადრეულ ეტაპს გადის.
მისივე შეფასებით, პრეპარატის გვერდით ეფექტების, ასევე გრძელვადიან პერიოდში მკურნალობის ეფექტების შესახებ ჯერ მწირი ინფორმაცია მოიპოვება.
როგორც აზარაშვილი განმარტავს, პრეპარატის შეძენაზე თანხმობა იშვიათი დაავადებების საკითხებზე მომუშავე საკოორდინაციო საბჭომ უნდა გასცეს და სამინისტროს ამგვარი ნებართვა ჯერ არ მიუღია.
„იშვიათი დაავადებების საკითხებზე მომუშავე საკოორდინაციო საბჭოზე დეტალურად იქნა განხილული სხვადასხვა ქვეყნების მაგალითები, სადაც მოხდა აღნიშნული მედიკამენტების შესწავლა. ასევე ჩვენი სამინისტროს მიერ გასული თვეების განმავლობაში აქტიური შესწავლის ეტაპები გავლილია. აქტიური კომუნიკაცია გვქონდა როგორც ჯანმრთელობის მსოფლიო ორგანიზაციასთან, ასევე პაციენტების უფლებების დაცვის ევროპულ საზოგადოებებთან და სხვადასხვა ქვეყანასთან, სადაც ეს განხილვები მიმდინარეობდა. აღნიშნულის გათვალისწინებით, ამ ეტაპზე, იშვიათი დაავადებების საკითხებზე მომუშავე საკოორდინაციო საბჭოს ამ მედიკამენტის შესყიდვასთან დაკავშირებით სამინისტროსთვის დადებითი რეკომენდაცია არ მიუცია“, – განაცხადა ზურაბ აზარაშვილმა მთავრობის სხდომაზე.
შეგახსენებთ, რომ დიდი ხანია, რაც აქონდროპლაზიის სინდრომის მქონე ბავშვების მშობლები საპროტესტო აქციებს მართავენ. ისინი ჯანდაცვის სამინისტროს სთხოვენ, რომ დაავადების სამკურნალო მედიკამენტი "ვოზორიტიდი" შემოიტანონ, თუმცა წამლის შემოტანა ამ დრომდე არ ხდება. მშობლებმა აქცია დღეს მთავრობის კანცელარიასთან გამართეს, სადაც მათ პრემიერ-მინისტრის შეხვედრა მოითხოვეს
აქონდროპლაზია გენეტიკური დაავადებაა, როცა ბავშვის სხეული ასიმეტრიულად ვითარდება და ის დაახლოებით 25 ათასიდან ერთ შემთხვევაში ვლინდება. წამალი, რომელიც ბავშვებისთვის სასიცოცხლოდ მნიშვნელოვანია დღეს საქართველოში არ შემოდის. მშობლები ამბობენ, რომ რომც შემოდიოდეს, დახმარების გარეშე, პირადი სახსრებით ვერ შეძლებენ მის შეძენას.
