„ისლამურ სახელმწიფოს“-თან კავშირის ბრალდებით საქართველოს 6 მოქალაქეა დაკავებული. სახელმწიფო უსაფრთხოების სამსახურის ინფორმაციით , ამ პიროვნებებს კავშირი ჰქონდათ "ისლამური სახელმწიფოს" ერთ-ერთ ლიდერთან, რომელთან ერთადაც სხვადასხვა ქვეყანაში ტერორისტულ აქტებს გეგმავდნენ.
ერთ-ერთი დაკავებული რუსთავში ცხოვრობს. ის ეროვნებით აზერბაიჯანელია. "მთავარი არხი" მათ საცხოვრებელ ადგილას იმყოფებოდა. დაკავებულის ოჯახის წევრები კომენტარს არ აკეთებენ, ხოლო მეზობლები ამბობენ, რომ დაკავებულის ოჯახი დაახლოებით 2 წელია მათ კორპუსში ცხოვრობს.
საქართველოს მოქალაქეების გარდა, დაკავებულია თურქეთის ერთი მოქალაქე, რომელიც ადვოკატის ცნობით, მიგრაციის დეპარტამენტშია მოთავსებული.
სპეცოპერაცია სუს-მა 4 სხვადასხვა ადგილას ჩაატარა. ბრალდებულები კი რუსთავში ორ სხვადასხვა ნაქირავებ ბინაში აიყვანეს. ისინი სამართალდამცველებს კარს არ უღებდნენ, რის გამოც საჭირო გახდა სახლში, ძალის გამოყენებით შესვლა.
დაკავებულები სუს-ში არიან გადაყვანილი და ჯერჯერობით ოფიციალურად ბრალი არ წარდგენიათ.
