წინასაარჩევნო პერიოდში ამომრჩეველთა სავარაუდო მოსყიდვის 8 ფაქტი გამოვლინდა — ISFED
გამოქვეყნდა:
არასამთავრობო ორგანიზაცია "სამართლიანი არჩევნებისა და დემოკრატიის საერთაშორისო საზოგადოების" (ISFED) მონიტორინგის მიხედვით, წინასაარჩევნო პერიოდში ამომრჩევლის სავარაუდო მოსყიდვის 8 ფაქტი გამოვლინდა.
ამომრჩეველთა სავარაუდო მოსყიდვის 8 ფაქტი, მათ შორის:
- საქართველოს პარლამენტის მაჟორიტარი დეპუტატებისა და ოფიციალურად დასახელებული მაჟორიტარობის კანდიდატების მიერ - 4;
- "ლელო საქართველოსთვის" მიერ - 1;
- "ერთიანი ნაციონალური მოძრაობის" მიერ - 2 შემთხვევა;
- თბილისის საკრებულოს ჩუღურეთის მაჟორიტარი დეპუტატის მიერ - 1.
მონიტორინგის მიხედვით, სავარაუდოდ, პოლიტიკური ნიშნით სამსახურიდან გათავისუფლების შემთხვევები 5 მუნიციპალიტეტში დაფიქსირდა.
- სავარაუდოდ პოლიტიკური ნიშნით ზეწოლა/მუქარა - 5;
- ადმინისტრაციული რესურსის სავარაუდო გამოყენების შემთხვევა - 2;
- სოციალური დახმარების გაცემისას, სავარაუდოდ, პოლიტიკური ნიშნით დისკრიმინაცია - 2;
- სამართლიანი არჩევნების დამკვირვებელზე ზეწოლა - 1;
- პოლიტიკურ საქმიანობაში ხელის შეშლის - 1 და ეკლესიის წინასაარჩევნო კამპანიაში ჩარევის შემთხვევა -1;
- პოლიტიკური პარტიის რეგისტრაციის პროცესში დაბრკოლების შექმნის 1 ფაქტი.
ანგარიშში აღნიშნულია, რომ ამომრჩეველთა სავარაუდო მოსყიდვის ფაქტები დაფიქსირდა ცაგერში, ამბროლაურსა და ონში "ქართული ოცნების" მოქმედი მაჟორიტარი დეპუტატის, გოჩა ენუქიძის სახელითაც, რომელიც ოფიციალურად მაჟორიტარობის კანდიდატად არის დასახელებული.
ISFED-მა 2020 წლის არჩევნების წინასაარჩევნო მონიტორინგის მეორე შუალედური ანგარიში დღეს, 4 აგვისტოს წარადგინა. ანგარიშში ძირითადად განხილულია 2020 წლის 5 ივლისიდან 3 აგვისტოს ჩათვლით პერიოდი, აგრეთვე მოვლენები, რომელთა განვითარება 5 ივლისამდე დაიწყო.
