ლაზარე გრიგორიადისის საქმეზე საბოლოო განაჩენის გამოცხადება სექტემბრამდე გადაიდო

დაკავებული აქტივისტის, ლაზარე გრიგორიადისის საქმეზე საბოლოო განაჩენის გამოცხადება სექტემბრამდე გადაიდო. სასამართლო პროცესი დღეს 11:00 საათზე იყო ჩანიშნული თუმცა, გაურკვეველი მიზეზებით განაჩენის გამოცხადება დაახლოებით 2 თვით გადაიწია.

გრიგორიადისის მამა დარწმუნებულია, რომ სასამართლო განაჩენის გამოცხადებას განგებ აჭიანურებს, რათა მისი შვილი ციხეში რაც შეიძლება დიდხანს დატოვონ.

"პროცესზე შემოიყვანეს მოწმე, რომელმაც აღრიცხვა გაუკეთა დამწვარ მანქანას. სულ 20 წუთი ილაპარაკა და დაამთავრეს სასამართლო. თქვენო უპირატესობავ მეთქი ამ დარბაზში, ეს რა სპექტაკლია, რატომ უწელავთ ამ ბავშვს ამ პროცესს, არ შეიძლება უფრო მალე დამთავრება მეთქი?! გაჩუმდი, თორემ გაგაძევებო. მე ვუთხარი პროტესტს გიცხადებთ და გამოვედი. ეტყობა რაც ხდება, მოსამართლეს ეუბნებიან რაც უნდა გააკეთოს და აკეთებენ იმას", - ამბობს ლაზარე გრიგორიადისის მამა.

შეგახსენებთ, რომ 31 მარტს თბილისის საქალაქო სასამართლომ მარტის აქციებზე დაკავებულ ლაზარე გრიგორიადისს აღკვეთის ღონისძიების სახით პატიმრობა შეუფარდა.

შსს-ს მტკიცებით, მან 7 მარტის საპროტესტო აქციაზე ორჯერ ისროლა ე.წ მოლოტოვის კოქტეილი პოლიციელების მიმართ, რის შედეგადაც რამდენიმე პოლიციელი დაშავდა. მას ასევე ბრალი ედება პოლიციის კუთვნილი მანქანის დაწვაში. საქმეზე გამოძიება სსკ-ის 353-ე პრიმა და 187-ე მუხლებით მიმდინარეობს. ბრალის დამტკიცების შემთხვევაში, დაკავებულს 7-დან 11 წლამდე პატიმრობა ემუქრება.