ბათუმში, კარანტინის დროს, სასტუმროს მეოთხე სართულიდან გადმოვარდნილი მამაკაცის გამოძიების საქმეზე შსს-მ 10-მდე პირი გამოკითხა. ინფორმაციას უწყება თავადვე ავრცელებს და წერს, რომ შემთხვევის დროს, მამაკაცი ნომერში მეგობართან ერთად იმყოფებოდა. უწყების ინფორმაციითვე, ფ.ჯ იქცეოდა არაადეკვატურად, აგრესიულად და ცდილობდა საკარანტინო წესების დარღვევას, რის გამოც ადგილზე პოლიცია და სასწრაფო გამოიძახეს.
გამოძიების ამ ეტაპზე დადგენილია, რომ მიმდინარე წლის 14 აგვისტოს, 1993 წელს დაბადებული ფ.ჯ. ბათუმში, ერთ-ერთი სასტუმროს ნომერში, სავალდებულო კარანტინის გავლის მიზნით იმყოფებოდა თავის მეგობართან - შ.თ.-სთან ერთად.
გამოძიებისთვის ჯერჯერობით დაუდგენელი მიზეზების გამო, საკარანტინო სივრცეში ფ.ჯ. გახდა აგრესიული და იქცეოდა არაადეკვატურად. კერძოდ, მან დატოვა სასტუმროს ნომერი, გამოვიდა დერეფანში და ხმაურობდა, დააზიანა სასტუმროს ინვენტარი, რითაც დაარღვია საკარანტინო წესები.
გამოძიების ინფორმაციით, შ.თ. შეეცადა მეგობრის დამშვიდებას. წესრიგის დაცვისკენ ფ.ჯ.-ს დაცვის პოლიციის და სასტუმროს თანამშრომლებმაც მოუწოდეს, თუმცა იგი არ დაემორჩილა მათ მოწოდებას, რის გამოც სასტუმროს ადმინისტრაციამ პოლიცია და სასწრაფო სამედიცინო დახმარება გამოიძახა.
ადგილზე მისულმა აჭარის პოლიციის დეპარტამენტის თანამშრომლებმა ფ.ჯ.-ს სიმშვიდისა და წესრიგის დაცვისკენ მოუწოდეს, ასევე, საჭიროების შემთხვევაში მას დახმარებაც შესთავაზეს.
სამართალდამცველებთან გასაუბრების შემდეგ ფ.ჯ. დამშვიდდა, დაემორჩილა პოლიციის მოთხოვნას და სასტუმროს ნომერში დაბრუნება გადაწყვიტა, მისივე დროებითი საცხოვრებელი ოთახისკენ გაემართა, თუმცა მოულოდნელად მიბრუნდა და სასტუმროს მე-4 სართულიდან შენობის შიდა ტერიტორიაზე გადახტა." ნათქვამია შსს-ს ინფორმაციაში.
ამ დროისთვის, დაშავებული მამაკაცი თბილისის საუნივერსიტეტო კლინიკაშია გადმოყვანილი. სასტუმრო "ლეგასში" შემთხვევა გუშინ მოხდა. გამოძიება სისხლის სამართლის კოდექსის 115-ე მუხლით მიმდინარეობს
შსს-ს ინფორმაციით, უკვე ჩატარებულია სხვადასხვა სახის საგამოძიებო მოქმედებები, ამოღებულია ფ.ჯ.-ს პირადი ნივთები და დანიშნულია ექსპერტიზები.